თარიღი    დრო

თუ ადეიშვილი სააკაშვილის წინააღმდეგ ჩვენებას მისცემს, საპროცესო გარიგებაზე თანახმა ვარ - დავითაშვილი

საქართველო, თბილისი - 15:37 09.12.2017 2492

„საქმე რომ დაიძრა, გამოძიება დაიწყო, რა თქმა უნდა, კარგია, მაგრამ მთავარი დამნაშავე, მიხეილ სააკაშვილი ჯერ განსასჯელის სკამზე არ ზის. ჩემთვის მთავარი დამნაშავე კი სააკაშვილია“, - განუცხადა „ჯი-ეიჩ-ენ-ს“ ყოფილმა პარლამენტარმა კობა დავითაშვილმა.

დავითაშვილის ცემის ფაქტზე საქმის განხილვა თბილისის საქალაქო სასამართლოში 8 სექტემბერს დაიწყო. თუმცა, პროცესს თავად დაზარალებული არ დასწრებია.

„პროცესებს არ ვესწრები, რადგან მიმაჩნია, რომ ამ საქმის მთავარი ორგანიზატორი მიხეილ სააკაშვილია. სანამ განსასჯელის სკამზე ის არ დაჯდება, ამ პროცესში მონაწილეობის აზრს ვერ ვხედავ. ზურაბ ადეიშვილი, რომელიც დღეს მთავარი ბრალდებულია, ბრძანების შემსრულებელი და შუალედური რგოლი იყო სააკაშვილსა და უშუალო შემსრულებლებს შორის. რამდენადაც ვიცი, ორმა პირმა ადეიშვილის წინააღმდეგ ჩვენება მისცა და ამის სანაცვლოდ, საპროცესო შეთანხმება უფრომდებათ.

ამასთან დაკავშირებით, პროკურატურამ ჩემი პოზიცია იკითხა. მათ ვუთხარი, რომ თუკი, ისინი ადეიშვილის წინააღმდეგ ჩვენებას მისცემენ, მათთან საპროცესო შეთანხმების გაფორმების წინააღმდეგი არ ვარ. იგივე პოზიცია მაქვს ადეიშვილთან მიმართებაშიც, თუკი, ის სააკაშვილის წინააღმდეგ ჩვენებას მისცემს, მის მიმართ საპროცესო შეთანხმების გაფორმების წინააღმდეგი არ ვიქნები. გამოძიება არ უნდა შეწყდეს და ადეიშვილით არ უნდა დასრულდეს, ის სააკაშვილით უნდა გაგრძელდეს.

სასამართლოსთვის ჩვენება არ მიუცია დაზარალებულს.

„ჩემი ჩვენება საქმეში დევს. თანამედროვე სისხლის სამართლის კოდექსით, დაზარალებული მხარედ არ ითვლება, ასე რომ, პროცესებში მისი მონაწილეობა აუცილებელი არ არის. თუ სასამართლო გამომიგზავნის უწყებას, რა თქმა უნდა, ჩვენებაზე უარს არ ვიტყვი“, - აცხადებს დავითაშვილი.

მისივე განმარტებით, ის საქმიდან სასურველ შედეგს არ ელოდება.

„ვერ გეტყვით, რომ რაღაც შედეგის დადგომას მოუთმენლად ველოდები. სურვილი მაქვს, რომ მიხეილ სააკაშვილი ციხეში ვნახო, მაგრამ ამას არ ველი, ამ პროცესზე ეს ასე არ მოხდება“, - განაცხადა „ჯი-ეიჩ-ენ-თან“ კობა დავითაშვილმა.  

საქმე მთავარმა პროკურატურამ გახსნილად 2016 წლის ივლისში გამოაცხადა და თავისუფლების უკანონოდ აღკვეთის ორგანიზებისა და სამსახურებრივი უფლებამოსილების გადამეტების ფაქტზე ბრალი ყოფილ გენერალურ პროკურორს ზურაბ ადეიშვილს წაუყენა.

თავისუფლების უკანონო აღკვეთის ორგანიზების და სამსახურებრივი უფლებამოსილების გადამეტების ბრალდებით, სისხლის სამართლის პასუხისგებაში მიეცნენ ფინანსთა სამინისტროს შემოსავლების სამსახურის უფროსის ყოფილი მოადგილე დავით ქარსელაძე და ფინანსთა სამინისტროს სპეცდანიშნულების რაზმის ყოფილი უფროსი ედიშერ კობახიძეც.

შეგახსენებთ, რომ კობა დავითაშვილს 2007 წლის, 7 ნოემბერს, აქციის დროს სცემეს.




konfliqtebi

ყველა სიახლის ნახვა...

komentari

ყველა სიახლის ნახვა...

dRis siaxleebi

ყველა სიახლის ნახვა

სარეკლამო ბანერი (250px)


arqivi


ბოლო სამი წლის განმავლობაში თქვენი პირადი შემოსავლები
გაიზარდა 81.8%
შემცირდა 15.1%
არ შეცვლილა 3.1%