დავით ოქიტაშვილმა გაერთიანებული პროფკავშირების წინააღმდეგ თბილისის საქალაქო სასამართლოში სარჩელი შეიტანა.
ოქიტაშვილის თქმით, სარჩელი იმ დარღვევების შესახებ შეიტანა, რაც დღეს პროფკავშირებში არსებობს.
"ირაკლი პეტრიაშვილი ემზადება ტოტალური გაყალბებისთვის, მაგრამ ჩვენ ყრილობის გაყალბების უფლებას არ მივცემთ. მე ვფიქრობ, რომ სასამართლო მიიღებს იმ გადაწყვეტილებას, რასაც ქართველი ხალხი ელოდება", - განაცხადა დავით ოქიტაშვილმა.
მისი ადვოკატის, შალვა ხაჭაპურიძის განცხადებით, დაირღვა ყრილობის მოწვევის წესი და სარჩელი მოწვევის წესთან დაკავშირებით შეიტანეს.
„ის, რაც პროფკავშირებში ხდება, ცალსახად შეიძლება ითქვას, რომ გასულია სამართლებრივი სივრციდან. უკანონოდ არის რეგისტრირებული წესდება. ამის შემდეგ პროფკავშირებს მიღებული აქვს უამრავი განკარგულებები, დებულებები, რომლებიც ასევე გასულია სამართლებრივი სივრციდან და რაც ყველაზე მნიშვნელოვანია ამ ეტაპზე ჩვენთვის, ყრილობის მოწვევის წესია დარღვეული. ამ ყრილობის მოწვევის წესთან დაკავშირებით შევიტანეთ სარჩელი. გვინდა, რომ საქართველოს პროფკავშირების ყრილობა მოექცეს სამართლებრივ ჩარჩოებში", - განაცხადა შალვა ხაჭაპურიძემ.
