დღეს რკინიგზის დეპარტამენტის სათაო ოფისთან 18:30-ზე "აუდიტორია #115-ის" ორგანიზებით რკინიგზელთა სოლიდარობის აქცია გაიმართება.
ორგანიზატორები მოუწოდებენ ხელისუფლებას, დაუყოვნებლივ და ღიად, მოშიმშილეების დასაცავად, მათი მოთხოვნების გათვალისწინებით ჩაერიოს პროცესში.
"საქართველოს რკინიგზის თანამშრომლებისა და პროფკავშირული მოძრაობის წევრების შიმშილობა ერთ კვირაზე მეტია გრძელდება. პროტესტის მონაწილეებს სასამართლო და პოლიცია კარვის გაშლის შესაძლებლობასაც არ აძლევს. ფიზიკურად დასუსტებული ადამიანები ღია ცის ქვეშ ათენებენ ღამეებს. რამდენიმე დღის წინ, მოშიმშილე უჩა ღვთისიაშვილზე თავდასხმა და ფსიქოლოგიური ზეწოლის განხორციელება სცადეს კრიმინალური მენტალიტეტის მქონე გურჯაანელმა მინი ავტორიტეტებმაც.
ხელისუფლების წარმომადგენლები პროფკავშირელებსა და ადმინისტრაციის გაუგებარი კომპეტენციისა თუ დამსახურების მქონე კარიერისტებს შორის დავაში ჩარევას არ ჩქარობენ. პოლიტიკური ელიტის წარმომადგენლები ზურგს უმაგრებენ მათ მიერვე დანიშნულ რკინიგზის ჩინოსნებს, რომლებმაც უკანასკნელი წლების განმავლობაში ვე...რც ერთხელ ვერ მოახერხეს დეპარტამენტში წარმოშობილი კრიზისის თავიდან აცილება და მოგვარება.
რჩება შთაბეჭდილება, რომ ხელისუფლება მოშიმშილეების დაღლასა და ჩინოსნების მიერ ბინძური მეთოდებით პროფკავშირელების გათიშვას ელოდება. ისინი არ ფიქრობენ მოშიმშილეების ჯანმრთელობის მდგომარეობაზე და არ სურთ, რომ რკინიგზაში მიმდინარე მრავალწლიანი კრიზისი სოციალური სამართლიანობის იდეის სასარგებლოდ დასრულდეს.
მოვუწოდებთ ხელისუფლებას, დაუყოვნებლივ და ღიად, მოშიმშილეების დასაცავად, მათი მოთხოვნების გათვალისწინებით ჩაერიოს პროცესში და ხელი შეუშალოს რკინიგზის ადმინისტრაციის "შტრეიკბრეხერულ" ინიციატივებს. წინააღმდეგ შემთხვევაში პროცესი შეიძლება ტრაგიკული მოვლენებით გაგრძელდეს. მოშიმშილეები პროტესტის გამოხატვას ოჯახის წევრებთან ერთად აპირებენ.
მოვუწოდებთ, სამოქალაქო საზოგადოებისა და მესამე სექტორის წარმომადგენლებს, რიგით მოქალაქეებს შემოუერთდნენ აუდიტორია 115-ის სოლიდარობის აქციას, რომლის მთავარი მიზანი მდიდარი ადმინისტრატორების გულგრილობისაგან მოშიმშილეთა სიცოცხლისა და ჯანმრთელობის დაცვა იქნება.
შემოგვიერთდით, 24 აგვისტოს, 18:30-ზე რკინიგზის დეპარტამენტის სათავო ოფისთან!
#აუდიტორია115", - აცხადებენ ორგანიზატორები.