დღეს, თბილისის საქალაქო სასამართლომ, დემირელის კოლეჯის ხარისხის მართვის მენეჯერს, მუსტაფა ემრე ჩაბუქს წინასაექსტრადიციო ვადა კიდევ 3 თვით გაუგრძელა. აღნიშნულ განჩინებას დაცვის მხარე გაასაჩვირებს. ამის შესახებ „ჯი-ეიჩ-ენ-ს“ ჩაბუქის ადვოკატმა, სოსო ბარათაშვილმა განუცხადა.
„დღეს მოსამართლემ გამოიტანა განჩინება, რომლის მიხედვითაც მუსტაფა ემრე ჩაბუქს 3 თვით გაუგრძელდა საექსტრადიციო პატიმრობა. თუმცა, მიგვაჩნია, რომ ეს განჩინება დასაბუთებული არ არის, ისევე როგორც პროკურორის შუამდგომლობა. საექსტრადიციო პატიმრობის ვადის ფორმალური და ფაქტობრივი საფუძვლები უნდა დაესაბუთებინათ. სასამართლო სამართლიანი რომ ყოფილიყო, ჩაბუქი საქსტარადიციო პატიმრობაში არ უნდა დარჩენილიყო. ამ განაჩენს ცხადია, გავასაჩივრებთ.
საქმეში უამრავი მტკიცებულება არსებობს, მათ შორის, საერთაშორისო ორგანიზაციების დასკვნები, რომლებიც მიუთითებენ, რომ მუსტაფა ემრე ჩაბუქის თურქეთში ექსტრადირება დაუშვებელია, რადგან ის წამებას, არაადამიანურ მოპყრობას დაექვემდებარება. მისი ოჯახის წევრები პროკურატურის მიერ სპეციალური დაცვის სპეციალურ პროგრამაში იქნენ ჩართული, რაც იმას ნიშნავს, რომ მათ საქართველოს ფარგლებს გარეთ საფრთე ემუქრებათ. დღევანდელ სასამართლო პროცესზე ეს არგუმენტები გათვალისწინებული არ იქნა. ჩაბუქს საბუთები, პასპორტი ხელისუფლებისთვის ჩაბარებული აქვს. არგუმენტი იმისა, რომ ის ახალ დანაშაულს ჩაიდენს, საერთოდ წარმოდგენილი არ ყოფილა“, - აცხადებს „ჯი-ეიჩ-ენ-თან“ ბარათაშვილი.
შეგახსენებთ, რომ მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. 7 ივლისს კი ცნობილი გახდა, რომ საქართველომ ჩაბუქს ლტოლვილის სტატუსის მინიჭებაზე უარი უთხრა. საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი, სოზარ სუბარი ამბობდა, რომ მუსტაფა ემრე ჩაბუქი თურქეთში ექსტრადირების შემთხვევაში, ევროპული დონის ციხეში მოხვდება და წამებას არ დაექვემდებარება.