ისნის ბაზრობაზე მომხდარი ხანძრის შედეგად დაზარალებულთა და ბაზრობის ადმინისტრაციას შორის შეხვედრის დასრულების შემდეგ ბაზრობის ადმინისტრაციამ წერილობით განცხადება გაავრცელა:
„შპს "ტრანსსერვისი” გამოძიების დასრულებამდე ნებაყოფლობით, საკუთარი ხარჯით უზრუნველყოფს ტერიტორიის გაწმენდას და იმ ჯიხურების აღდგენას, რომლებიც განადგურდნენ 2017 წლის 19 ივლისს გაჩენილ ხანძრის შედეგად.
აღნიშნულთან დაკავშირებით მოგიწოდებთ, აქტიურად ჩაერთოთ პროცესში, დროულად აღწეროთ ქონება და შეაფასებინოთ მიყენებული ზიანი, მიიღოთ მონაწილეობა ქონების გადარჩევაში, ჯიხურებისა და მიმდებარე ტერიტორიის დასუფთავებაში, გადარჩენილი ქონების გატანასა და ჯიხურების აღდგენაში, რაც მოგცემთ საშუალებას, უმოკლეს ვადაში შეძლოთ საქმიანობის გაგრძელება,“ - ნათქვამია განცხადებაში.
შეგახსენებთ, რომ ხანძარი ისანში, ე.წ. დაშლილების ბაზრობაზე, სადაც მეორად ავტონაწილებს ყიდიან, 19 აგვისტოს გაჩნდა.
დამწვარი ობიექტების აღსაწერად დღეს ადგილზე ექსპერტ-კრიმინალისტები მუშაობდნენ.
ერთ-ერთი დაზარალებულის თქმით, მისი ზარალის ოდენობა 20-25 ათას ლარს აღწევს.