კომპანია „ტრანს სერვისის“ გენერალური დირექტორის, ბექა მახარაძის განცხადებით, ისნის მეორადი ავტონაწილების ბაზრობაზე ხანძრისგან დაზარალებულებს კომპანია შესაძლებლობის ფარგლებში მაქსიმალურად დაეხმარება.
მისივე თქმით, კომპანიას აქვს ბევრი ფინანსური ვალდებულება და შესაბამისად, უნდა დაითვალოს რამდენით და როგორ შეძლებს „ტრანსს სერვისი“ დაზარალებულების დახმარებას.
„კომპანიამ გადაწყვიტა, რაღაც დოზით დახმარება გაუწიოს ინდმეწარმეებს. კომპანიას რისი ფინანსური საშუალება ექნება, იმის მიხედვით გავუწევთ დახმარებას. რამდენიმე ადამიანი ახსენებს, თითქოს კომპანია დახმარებაზე უარს ამბობს. 2015 წელს აბსოლუტურად ყველა დაზარალებული ჩვენი მხრიდან იქნა კომპენსირებული. კომპანიას დიდი კრედიტი აქვს აღებული და რისი საშუალებაც იქნება, აუცილებლად დავეხმარებით. ეს ყველაფერი გადაწყდება მას შემდეგ, რაც ყველაფერი დაითვლება.
დახმარების ერთ-ერთი ფორმა, შემოსავლების სამსახურის თანხმობის შემთხვევაში, შესაძლოა, დაზარალებულების გარკვეული პერიოდით იჯარისგან გათავისუფლებაც იყოს. “, - განაცხადა მახარაძემ.
შეგახსენებთ, რო ხანძრის შედეგად დაზარალებულები ხელისუფლებისგან დახმარებას და ბაზრობის ადმინისტრაციისგან ზარალის ანაზღაურებას ითხოვენ.
მათი ინფორმაციით, საქონლის უმეტესობა განადგურებულია.
შემთხვევის ადგილზე გამომძიებლები მუშაობას განაგრძობენ.
ამ დროისთვის დაზარალებულები დამწვარი ტერიტორიაზე შესვლას ვერ ახერხებენ.
ცნობისთვის, ისნის ბაზრობაზე, ე.წ. დაშლილების ტერიტორიაზე, ხანძარი გუშინ გაჩნდა.
ცეცხლი 1200 კვადრატულ მეტრ ფართობზე იყო გავრცელებული. ხანძრის ჩასაქრობად ადგილზე 20-მდე სახანძრო ბრიგადა და 100-მდე მეხანძრე-მაშველი მუშაობდა.
ისმოდა აფეთქებების ხმაც, რადგან მეორადი ავტომობილების ნაწილს ჰქონდა საწვავის ავზი, ასევე ადგილზე იყო სამუშაო გაზის ბალონები და აფეთქება სწორედ ამან გამოიწვია.