თბილისის საქალაქო სასამართლოს მიერ გამოტანილ გადაწყვეტილებას, რომლის მიხედვითაც ჭონქაძის ქუჩაზე მომხდარ მკვლელობაში ბრალდებულ მიხეილ იაშვილს აღკვეთის ღონისძების სახით პატიმრობა შეეფარდა, დაცვის მხარე არ ეთანხმება და გაასაჩივერებს.
„ბრალდების მხარის მიერ ვერ იქნა დასაბუთებული მათ მიერ მოთხოვნილი აღკვეთის ღონისძიების მიზანშეწონილობა და სხვა ნაკლებად მკაცრი აღკვეთის ღონისძიების მიზანშეუწონლობა. თუმცა, სასამართლოს მიერ დაცვის მხარის პოზიცია არ იქნა გაზიარებული. აღნიშნულ გადაწყვეტილებას არ ვეთანხმებით, ის უკანონოდ და დაუსაბუთებლად მიგვაჩნია, მის გასაჩვივრებას ვგეგმავთ, მანამდე კი ბრალდებულთან კონსულტაციას გავივლით. იაშვილი დანაშაულს არ აღიარებს და მის მიმართ წაყენებულ ბრალს არ სცნობს. ის გამოძიებას უნდობლობას უცხადებს“,- განუცხადა „ჯი-ეიჩ-ენ-ს“ მიხეილ იაშვილის ადვოკატმა, დავით ცინცქილაძემ.
გამოძიების ინფორმაციით, მიხეილ იაშვილმა მკვლელობა შურისძიების მოტივით ჩაიდინა, რასაც ადვოკატი არ ეთანხმება და აცხადებს, რომ იშავილსა და მოკლულ ძნელაძეს კონფლიქტი არ ჰქონიათ.
„კონფლიქტს ვერ დაგიდასტურებთ. შესაბამისად, თითქოს, ის რომ იაშვილმა ძნელაძის მკვლელობა შურისძიების ნიადაგზე განახორციელა, საფუძველს მოკლებულია, ამის მტკიცებულება საქმეში არ დევს. მიხეილ იაშვილი ამბობს, რომ ძნელაძესთან ნაცნობური ურთიერთობა ჰქონდა, ეს არ იყო არც მეგობრული და არც კონფლიქტური“, - აღნიშნავს ცინცქილაძე.
დღევანდელ სასამართლო პროცესზე ბრალდებულმა განაცხადა, რომ დაკავების მომენტში მას სამართალდამცავებმა ფიზიკური შეურაცხყოფა მიაყენეს და სასურველი ჩვენების მიცემის მიზნით მასზე ზეწოლას ანხორციელებდნენ. მისივე თქმით, სასურველი ჩვენების მიცემის მიზნით, ზეწოლა ხორციელდებოდა მის მეუღლეზეც.
„პროკურორმა მზადყოფნა გამოთქვა და განაცხადა, რომ ის ბრალდებულის გაცხადებულზე რეაგირებას აუცილებლად მოახდენს“, - აცხადებს ადვოკატი.
ის იმ საეჭვო გარემოებებზეც საუბრობს, რაც საქმის გარშემოა.
„მიხეილ იაშვილი შეეცადა მოსამართლე მის უდანაშაულობაში დაერწმუნებინა. მან სასამართლოს იმ გარემოებებზე მიუთითა, რაც აშკარად აჩვენებს, რომ აღნიშნულ მკვლელობაში ბრალდებულის მონაწილეობა ნამდვილად საეჭვოა. ჩვენ ვვარაუდობთ, რომ კახა ძნელაძის მეუღლე შემთხვევის ადგილზე მკვლელობას არ შესწრებია. საეჭვო გარემოებაა ის, რომ თითქოს, მიხეილ იაშვილს ჩაფხუტი ეხურა, რომლის შუშაც აწეული იყო და ასე ამოიცნო ძნელაძის მეუღლემ ბრალდებული. ბუნებრივია, ჩვენ მსგავს პირობებში აუცილებლად მოვითხოვთ ადამიანის ამოცნობას. საინტერესოა, თუ მოახერხებს ის ჩაფხუტში ნაცნობი ადამიანის ამოცნობას“, - აცხადებს „ჯი-ეიჩ-ენ-თან“ დავით ცინცქილაძე.
წინა სასამართლო სხდომა 5 ოქტომბერსაა ჩანიშნული.