მთაწმინდაზე, ჭონქაძის ქუჩაზე მომხდარ მკვლელობაში ბრალდებულის, მიხეილ იაშვილის ადვოკატი, დავით ცინცქილაძე „ჯი-ეიჩ-ენ-ის“ შეკითხვას, ჰყავს თუ არა ბრალდებულს მოტოციკლი, ან ავტომანქანა, ვერ პასუხობს.
„ამ ეტაპზე ამ კითხვაზე პასუხის გაცემისგან თავს შევიკავებ“, - აცხადებს დავით ცინცქილაძე. ის უახლოეს საათებში დროებითი მოთავსების იზოლატორში მიხეილ იაშვილს შეხვდება.
„დაცვის ეფექტური განხორციელების და მისგან უფრო დეტალური ინფორმაციის მიღების მიზნით ჩემი დაცვის ქვეშ მყოფთან დროებითი მოთავსების იზოლატორში ვაპირებ შესვლას. გუშინ საღამოს, იმ დროს, როცა იაშვილი სახლში იმყოფებოდა და ეძინა, მოულოდნელად სამართალდამცავები ესტუმრნენ, რომლებმაც გადაუდებელი აუცილებლობით ბინის ჩხრეკა მოახდინეს. თუმცა, ბინის ჩხრეკის შედეგად რაიმე სახის კანონსაწინააღმდეგო ნივთიერება არ ამოუღიათ. ამის შემდეგ მოხდა მისი საცვლების ამარა, მოწმის სახით დაკითხვის მიზნით პოლიციის განყოფილებაში იძულებით გადაყვანა.
გამოძიებისათვის წუხანდელ ფაქტთან დაკავშირებით მას რამე ღირებული ინფორმაცია არ მიუწოდებია, თუმცა, ამის მიუხედავად, გამოძიებამ მისი ბრალდებულის სახით დაკავების გადაწყვეტილება მიიღო“, - აცხადებს ცინცქილაძე.
ადვოკატის განცხადებით, იაშვილს მკვლელობასთან კავშირი არ აქვს.
„ჩემი დაცვის ქვეშ მყოფი მსგავს შემთხვევასთან კავშირს უარყოფს და დაკავებასთან დაკავშირებით პროტესტს, უვადო შიმშილობას და საქართველოს მოქალაქეობაზე უარს აცხადებს. აქვე აღვნიშნავ, რომ იაშვილის ჯანმრთელობის მდგომარეობა ძალიან მძიმეა, მისი გადმოცემით ის პირველი ჯგუფის შშმ პირია. მას ვიზუალურადაც ეტყობა, რომ ჯანმრთელობასთან დაკავშირებით პრობლემები აქვს. მისი ოჯახიც და თავად დაკავებულიც აცხადებს, რომ ის სახლიდან ძირითადად არც გამოდიოდა. ეს მისი ჯანმთელობის მდგომარეობითაც იყო განპირობებული. ის სამართალდამცავებს მძინარე მდგომარეობაში დახვდა. თუ ჩემი დაცვის ქვეშ მყოფს მართლაც რამე კავშირი აქვს მკვლელიობასთან, ბუნებრივია, მკვლელი პოლიციელებს მძინარე მდგომარეობაში არ დახვდებოდა“, - აღნიშნავს ადვოკატი.
მოკლულის ახლობლები და ოჯახის წევრები იაშვილსა და ძნელაძეს შორის წარსულში არსებულ კონფლიქტზე საუბრობენ. ერთ-ერთი ვერსიით, მოკლულის ნაცნობს ე.წ. ტაქსების ბიზნესთან დაკავშირებით იაშვილთან კონფლიქტი ჰქონდა, რისი განეიტრალებაც ძნელაძემ სცადა. ადვოკატი ამ ფაქტს უარყოფს.
„მსგავსი ინფორმაცია ჩემთვის უცნობია. იაშვილი არ ადასტურებს მასსა და ძნელაძეს შორის კონფლიქტის არსებობას. ეს ნაცნობობა არც მეგობრული და არც კონფლიქტური იყოო, ასე მიუთითებს. გაოგნებული ვართ, რა კავშირი აქვს მიხეილ იაშვილს გუშინდელ ფაქტთან დაკავშირებით. ეს ჩვენთვისაც ამოუცნობია“- აცხადებს ცინცქილაძე.
ერთ-ერთი ვერსიით, მკვლელობაში ბრალდებული ავტომობილით გადაადგილდებოდა. მეორე ვერსიით კი, მან მოტოციკლიდან განახორციელა გასროლა. ჰყავს თუ არა მკვლელობაში ბრალდებულს აღნიშნული ტრანსპორტებიდან რომელიმე, ადვოკატს პასუხის გაცემა უჭირს.
„ამ ეტაპზე ამ კითხვაზე პასუხის გაცემისგან თავს შევიკავებ“, - აცხადებს „ჯი-ეიჩ-ენ-თან“ დავით ცინცქილაძე.
