რაჭაში მდინარე ლუხუნის ხეობაში ჩაკეტილი გზა დროებით გაიხსნა.
საზოგადოებრივის ინფორმაციით, ამ წუთებში აღნიშნულ გზაზე გადაადგილდებიან, როგორც მაღალი გამავლობის, ასევე მსუბუქი ავტომობილები, თუმცა ადგილობრივი ხელისუფლების წარმომადგენლები ამბობენ, რომ საშიშროება დიდია, რადგან მთიდან ქვები ამ წუთებშიც ცვივა და შესაძლოა, მთა ჩამოიშალოს. რისკის ქვეშ გადაადგილება უწევთ ადამიანებს, რომლებიც ცდილობენ დაუკავშირდნენ სამ სოფელს.
შეგახსენებთ, რომ მთის ჩამოშლის გამო, ორი დღით გარესამყაროს იყო მოწყვეტილი სამი სოფელი - ლიხეთი, აბარი და ურავი.
ამ სოფლებში დღეის მონაცემებით, 900 ოჯახი ცხოვრობს.
გზის გაწმენდითი სამუშაოების პარალელურად მიმდინარეობს ძველი გზის აღდგენითი სამუშაოები. ძველი გზა გუბერნიის ინფორმაციით, დღის ბოლომდე აღდგება, თუმცა ამ გზაზე გადაადგილება მხოლოდ მაღალი გამავლობის ორხიდინია მანქანები შეძლებენ.
გზის გახსნასთან დაკავშირებით ინფორმაცია გაავრცელა საქართველოს საავტომობილო გზების დეპარტამენტმა. მათი ინფორმაციით, ამბროლაურში, წესი-ურავის საავტომობილო გზაზე საღამოს 19:00 სთ-დან დილის 07:00სთ-მდე მოძრაობა იკრძალება.