შინაგან საქმეთა სამინისტროს პრესსამსახურის განცხადებით, უკრაინული გამოცემის "სტრანა უამ"-ის მიერ გავრცელებული აუდიო ჩანაწერის ნამდვილობა გამორიცხულია.
„მსგავსი სატელეფონო საუბარი საერთოდ არ შემდგარა, არც უკრაინის შს მინისტრთან და არც სხვა პირთან“, - აცხადებენ სამინისტროში.
მათივე თქმით, იმის დაშვებაც კი, რომ ორი ქვეყნის შს მინისტრები სახელმწიფოებრივად მნიშვნელოვან თემებს განიხილავენ არადაცული სატელეფონო კავშირის მეშვეობით, არასერიოზულია.
უკრაინული ვებ გვერდის, „სტრანა უა“-ს მტკიცებით კი ცნობილმა რუსმა სატელეფონო თაღლითმა, "ვოვანმა" საქართველოს შინაგან საქმეთა მინისტრს დაურეკა, თავი უკრაინის შინაგან საქმეთა მინისტრ არსენი ავაკოვად წარუდგინა.
"ვოვანი“ და „ლექსუსი“ რუსულ მედიასთან საუბარში ყვებიან, თითქოს მღებრიშვილს მიხეილ სააკაშვილის ექსტრადირება შესთავაზეს. აუდიოჩანაწერის თანახმად, თითქოსდა გიორგი მღებრიშვილი ექსპრეზიდენტს უცენზურო სიტყვებით მოიხსენიებს და უკრაინულ მხარეს სთხოვს, არ გადმოსცენ ის საქართველოს. ამასთან, ვიდეოს თანახმად, თითქოსდა გიორგი მღებრიშვილი ამბობს, რომ ეს პოზიცია პრემიერ-მინისტრ გიორგი კვირიკაშვილთან შეთანხმებულია.
“ჩვენ ვითათბირეთ, სჯობს ის იყოს თქვენთან, ვიდრე იჯდეს აქ ციხეში. ჩვენ არ გვინდა მისგან შევქმნათ გმირი. თუ ის აქ ჩამოვა, დაიწყება ვნებათაღელვა. თუ ის უკრაინაში გამოჩნდება, არ გადმოგვცეთ”, - ისმის აუდიოჩანაწერში.