BGEO -ს შვილობილმა „კავკასიის ქარის “ მცხეთაში ქარის პოტენციალის შესწავლა დაიწყო.
კომპანიამ მცხეთის მუნიციპალიტეტში სახელმწიფოსგან 2 მიწის ნაკვეთი უკვე შეიძინა, ჯამში 5 ჰა, რისთვისაც 74.5 ათას ლარს გადაიხდის.
“კავკასიის ქარის კომპანიაში" აღნიშნავენ, რომ ამ ეტაპზე, ქარის პოტენციალის შეფასება 7 ლოკაციაზე მიმდინარეობს და მათ შორის ერთ-ერთი მცხეთაა.კვლევები ასევე მიმდინარეობს ტყიბულის, ქუთაისის და თბილისის შემოგარენის ორ ლოკაციაზე.
კომპანიის წარმომადგენელი არჩილ გაჩეჩილაძე ამბობს, რომ კვლევა/შეფასებას 6-12 თვე დასჭირდება.
კომპანიაში აცხადებენ, რომ მიწის შესყიდვის პროცესი ქარის პოტენციის დადგენისას და მშენებლობის ეტაპზე გადასვლისას მუდმივად ექნებათ.
გაჩეჩილაძე ამბობს, რომ დაგეგმილია 300 მგვტ-მდე ქარის სიმძლავრის ათვისება, თუმცა განვითარება მოხდება იმის მიხედვით, თუ როგორ მიიღებს სისტემა ამ ენერგიას.
BGEO-ში ელიან, რომ 1 მგვტ-ზე ინვესტიცია $1.5 მილიონ დოლარზე ნაკლები იქნება, თუმცა ამ ეტაპზე კონკრეტულ თანხებს ვერ ასახელებენ.
განახლებადი ენერგიის ათვისება BGEO GROUP-ის პრიორიტეტია და ჯგუფის გენერალურმა დირექტორმა ამ მიმართულებით მასშტაბური ინვესტიციები უკვე დააანონსა.
„ჩვენ ვფიქრობთ, რომ საქართველოში დიდი პოტენციალია ქარისა და მზის ენერგიის კუთხით. საერთო ჯამში, „ბიჯეო“ ჯგუფი შემდეგი 5-დან 7 წლის განმავლობაში, მინიმუმ ნახევარი მილიარდი დოლარის ინვესტიციების განხორციელებას გეგმავს, სწორედ ენერგეტიკის სფეროში“-განაცხადა ადრე „ბიჯეო ჯგუფის“ გენერალურმა დირექტორმა, ირაკლი გილაურმა.