მიხეილ სააკაშვილი უკრაინაში ჩასვლას მხოლოდ ვიზის აღების შემთხვევაში შეძლებს, - ამის შესახებ უკრაინის გენერალური პროკურორის მოადგილე ევგენი ენინი წერს.
მისი ინფორმაციით, პირებს საზღვრის უკანონო გადაკვეთის ხელშეწყობისთვის სისხლის სამართლის პასუხისმგებლობა ემუქრებათ.
„სააკაშვილის (მოქალაქეობის არმქონე პირის, თუ არ დადასტურდება ინფორმაცია მესამე ქვეყნების პასპორტის არსებობის შესახებ) შეშვება უკრაინაში შესაძლებელია მხოლოდ ვიზის გაფორმების შემდეგ.
ნებისმიერი პერფორმანსები აქტივისტების გარემოცვაში და საზღვრის არალეგალური გადაკვეთა იძლევა ასპროცენტიან სამართლებრივ საფუძველს ადმინისტრაციული პასუხისმგებლობისთვის, ხოლო პირებს, რომლებიც ხელს უწყობენ საზღვრის უკანონო გადაკვეთას, სისხლის სამართლის პასუხისმგებლობა ემუქრებათ (და არ თქვათ მერე, რომ არ იყავით გაფრთხილებული)“, - წერს ენინი, რომელიც აქვე აღნიშნავს, რომ სააკაშვილისთვის უკრაინის მოქალაქეობის მინიჭების დროს დაშვებული დარღვევების გამო პასუხი უნდა აგონ შესაბამისმა მაღალჩინოსნებმა, თუმცა პასუხისმგებლობა ეკისრება სააკაშვილსაც, რომელმაც ამ დოკუმენტს ხელი მოაწერა.