„ნარკოტიკებთან დაკავშირებით არსებული მდგომარეობა არ არის დამაკმაყოფილებელი“, - ამის შესახებ საქართველოს პარლამენტის თავმჯდომარემ, ირაკლი კობახიძემ განაცხადა.
მისივე თქმით, პარლამენტი თავის მნიშვნელოვან წვლილს შეიტანს ამ პრობლემის გადაწყვეტაში.
„მოსაზრებები გაყოფილია, თუმცა, მიზანი აქვს ყველას ერთი. მიზანი არის ის, რომ საქართველოში შემცირდეს ნარკომოხმარება და შესაბამისად, ამ მიზნის მიღწევისთვის ყველაფერი უნდა გაკეთდეს.
რაც შეეხება მიზნის მიღწევის გზებს, მხოლოდ ამასთან დაკავშირებით არის აზრთა სხვადასხვაობა და საჭიროა დისკუსია იმისთვის, რომ ჩამოყალიბდეს სწორი პოზიცია. პარლამენტი თავის მნიშვნელოვან წვლილს შეიტანს ამ საქმეში და მზად არის თვითონ გახდეს პლატფორმა ასეთი დისკუსიისთვის.
ჩვენ უნდა მივიღოთ აუცილებლად ცვლილებები. დღევანდელი მდგომარეობა არავისთვის არ არის დამაკმაყოფილებელი. უნდა მივიღოთ ისეთი ცვლილებები, რომელიც ყველა ჩვენგანის საერთო მიზანს მიაღწევს.
აზრთა სხვადასხვაობებს აქვს თავისი საფუძველი. ყველას აქვს თავისი არგუმენტები. მთავარია ჩვენ სწორი პოლიტიკა შევიმუშაოთ ნარკოტიკებთან დაკავშირებით",-განაცხადა ირაკლი კობახიძემ.