საქალაქო სასამართლომ იუსტიციის მინისტრი კანონდამრღვევად ცნო. ამის შესახებ ინფორმაციას "რუსთავი 2" ავრცელებს.
არსებული ინფორმაციით, თეა წულუკიანმა მართლმსაჯულების პირველი ინსტანციისგან სიტყვიერი შენიშვნა საჯარო ინფორმაციის დამალვის გამო მიიღო.
„თეა წულუკიანი, დაბადებული 1975 წლის 21 იანვარს, ცნობილ იქნეს სამართალდამრღვევად საქართველოს ადმინისტრაციული სამართალდარღვევათა კოდექსის 173-ე მუხლით და ამავე კოდექსის 22-ე მუხლის შესაბამისად გათავისუფლდეს ადმინისტრაციული პასუხისმგებლობისგან, გამოეცხადოს სიტყვიერი შენიშვნა“, - წერია თბილისის საქალაქო სასამართლოს გადაწყვეტილებაში.
ცნობისთვის, დავა თეა წულუკიანსა და სახალხო დამცველ უჩა ნანუაშვილს შორის გასულ წელს დაიწყო, როდესაც ინფორმაციის თავისუფლების ინსტიტუტმა იუსტიციის სამინისტროსგან საჯარო ინფორმაცია გამოითხოვა, თუმცა დოკუმენტები ვერ მიიღო. ამის შემდეგ არასამთავრობომ რეაგირებისთვის სახალხო დამცველს მიმართა.
"რუსთავი 2"-ის ცნობით, ინფორმაცია, რომელის დამალვაც თეა წულუკიანს კანონდამრღვევის სტატუსის ფასად დაუჯდა, სამინისტროში ხელფასებს, პრემიებს, დანამატებს და სხვა წარმომადგენლობით ხარჯებს ეხებოდა.