ჯემფესტი არის ის იშვიათი, თუ ერთადერთი არა, წარმატებული პროექტი, რომელიც ამ ხელისუფლების დროს განხორციელდა, - ამის შესახებ საპარლამენტო უმცირესობის წევრი რომან გორიციძე Facebook-ის პირად გვერდზე წერს.
როგორც "ნაციონალური მოძრაობის" წევრი აღნიშნავს, ის მანამ ვერ იქნება ამ ფესტივალის მხარდამჭერი, სანამ მას ბიუჯერი დააფინანსებს. მისი თქმით, ის მხოლოდ მაშინ დაიჯერებს GEM Fest-ის სიცოცხლისუნარიანობას, როცა ავტონომიურ რეჟიმში გადავა.
"ჯემფესტი არის ის იშვიათი, თუ ერთადერთი არა, წარმატებული პროექტი, რომელიც ამ ხელისუფლების დროს განხორციელდა. მას ყირიმის ოკუპაციის შემდეგ კაზანტიპის ანაკლიაში გადმოტანამ ჩაუყარა საფუძველი.
არა აქვს მნიშვნელობა, მოგვწონს თუ არა პიროვნულად მისი ორგანიზატორი ან ის ადამიანები, რომლებიც ცდილობენ ამით პოლიტიკური ქულების ჩაწერას.
ის სამწუხარო ინციდენტი, რაც ნარკოტიკებთან დაკავშირებით მოხდა, არ უნდა იქნას გამოყენებული ამ პროექტის დისკრედიტაციისათვის. იქ, სადაც 20 ათასი ადამიანი იყრის თავს, არა აქვს მნიშვნელობა, სტადიონი იქნება ეს, ქუჩა თუ საკონცერტო სივრცე, სამწუხაროდ, არაა გამორიცხული რაიმე სახის უბედური შემთხვევა. ამიტომ, არ არის სწორი, რომ ეს მხოლოდ ელექტრონული მუსიკის ატრიბუტად ჩავთვალოთ.
მე სხვა სახის პრეტენზია მაქვს-სანამ ამ პროექტში მონაწილეობს ბიუჯეტის ფული (თუმცა ეს ბევრად ნაკლებია, ვიდრე კომერციული შემოსავალი), ვერ ვიქნები ბოლომდე მისი აქტიური მხარდამჭერი. მაშინ შემიძლია დავიჯერო მისი სიცოცხლისუნარიანობა, როცა ავტონომიურ რეჟიმში გადავა.
ეს ფესტივალი ახალი სიტყვაა ახალგაზრდული ტურიზმის სფეროში და მას მხარდაჭერა სჭირდება", - წერს გოცირიძე.