პუტინის სოხუმში ჩასვლის შესახებ ინფორმაციას "ევროპული საქართველოს" ერთ-ერთი ლიდერი დავით ბაქრაძე ეხმიანება და აცხადებს, რომ რუსეთს აუცილებლად მოეკითხება პასუხი საქართველოს წინაშე ჩადენილი დანაშაულის გამო.
მისივე თქმით, დამნაშავე ყოველთვის უბრუნდება დანაშაულის ადგილს, პრეზიდენტი პუტინიც ჩადის იმ დანაშაულის ადგილზე, რომელიც რუსეთის სახელმწიფომ საქართველოს, ათასობით დაღუპული ადამიანისა და ასობით ათასი დევნილის ოჯახის წინაშე ჩაიდინა.
"დარწმუნებული ვარ, ჩვენ უცხოელ პარტნიორებთან ერთად შევძლებთ, აღვადგინოთ ისტორიული სიმართლე და გამოვასწოროთ ის დანაშაული, რომელიც რუსეთმა ჩვენი სახელმწიფოს წინაშე ჩაიდინა", - აღნიშნა ბაქრაძემ.
შეგახსენებთ, რომ რუსეთის პრეზიდენტი ვლადიმერ პუტინი სოხუმში ჩასვლას 8 აგვისტოს გეგმავს.