8 წლიანი უკანონო პატიმრობის შემდეგ გათავისუფლებულ თამაზ გოგიას უჭირს იმაზე საუბარი, თუ რატომ დააბრალეს მას საკუთესო მეგობრის, გენერალ თამაზ ნინუას და მისი მეუღლის, ეთერ ნინუას მკვლელობა.
”ეს დანაშაული მაინც და მაინც მე რატომ დამბრალდა, ამაზე თავს ვიჭყლიტავ და პასუხი არ მაქვს. რატომ ამარჩიეს მე? თურმე, ერთი გასროლით მოვკალი, იქაურობას წიწაკა მოვაყარე, გამათბობელი ჩავრთე, რომ ძაღლს სუნი არ აეღო. ასეთი ქილერი თუ ვიყავი, თამაზს ცალკე მოვკლავდი, სახლში არ მივიდოდი და ეთერ ნინუას არ მოვკლავდი, უვადო პატიმრობაზე არ წავიდოდი. იმ ქალბატონს რაღას ვერჩოდი”, - განუცხადა ”ჯი-ეიჩ-ენს” თამაზ გოგიამ.
მას უჭირს ვერსიებზე და იმაზე საუბარი, თუ ვისი ჩადენილი შეიძლება იყოს ის დანაშაული, რომლის გამოც მას ციხეში უსამართლოდ ყოფნა მოუწია. გავრცელებულ ინფორმაციას, რომ შესაძლოა გენერალ თამაზ ნინუას და მისი მეუღლის, ეთერ ნინუას მკვლელობის საქმეში ტელე-რადიო ”საქართველოს ხმის” დამფუძნებლის, ბიძინა კუჭავას კვალზე გავიდნენ, გოგია ვერ ადასტურებს.
„ეს დანაშაული ვისი ჩადენილია, რომ ვიცოდე, 8 წელი ციხეში უდანაშაულოდ არ ვიჯდებოდი. ნინუების მკვლელობამდე 2 წლით ადრე, გოჩა მაღალთაძე მოკლეს. ორივე შემთხვევაში, მკვლელობის იარაღი და ხელწერა ერთი იყო. რატომ, ვინ იყო ის, როგორ გითხრათ? ამაზე ეჭვიც რომ მქონდეს, როგორ ვიტყვი, ისეთ ცოდვას როგორ ჩავიდენ, როგორიც ჩემს მიმართ ჩაიდინეს”, - აცხადებს გოგია.
მისი თქმით, ის ბიძინა კუჭავას არც კი იცნობდა.
„კუჭავა თვალით არასდროს მინახავს, არ ვიცნობდი და როგორ ვთქვა მასზე რამე? ყველაფერი პრესიდან, ტელევიზიიდან გავიგე. მახსოვს, ერთხელ, როცა თამაზ ნინუას სახლთან გავუარე, ვიღაც კაცს ესაუბრებოდა, მერე იმას გამოემშვიდობა, ჩემს ავტომობილში ჩაჯდა და მითხრა, ეს კაცი ბიძნა კუჭავაა, ვინც მანქანის ფულის ამოღებში მეხმარებაო, მეტი არაფერი უთქვამს და არც არაფერი ვიცი. მე ხომ დანაშაული დამაბრალეს და იგივეს მე როგორ ჩავიდენ“!,- განუცხადა ”ჯი-ეიჩ-ენს“ თამაზ გოგიამ.
შეგახსენებთ, რომ აღნიშნული მკვლელობა 2009 წლის 11 ნოემბერს, თბილისში, მიცკევიჩის ქუჩაზე მოხდა. გენერალი თამაზ ნინუა და მისი მეუღლე, ეთერ ნინუა სახლში ჩაცხრილული საკუთარმა შვილმა იპოვა. მკვლელობაში ბრალდებულად ოჯახის უახლოესი მეგობარი, თამაზ გოგია სცნეს. სასამართლომ მაშინ შეკრებითობის პრინციპით გოგიას 69 წელიწადნახევარი მიუსაჯა, თუმცა, ასაკის გათვალისწინებით, სასჯელის ზომად 30 წელი განესაზღვრა. ხელისუფლების შცვლის შემდეგ მას ამნისტიის შედეგად 12 წელი დარჩა, საიდანაც 8 წელი მოიხადა.
