„ფსიქიკურად, მორალურად, მატერალურად ზარალი მომადგა და დაზარალებულად მცნეს კიდეც. რა საკვირველია, ამ საქმეს სამართლებივ მსვლელობას მივცემ, რომელსაც ადვოკატები მიხედავენ. აბა რა ვქნა, 69 წლის კაცი ვარ, 61 წლის ასაკში დამაპატიმრეს,  8 წელი ციხეში ტყუილად ვიჯექი. ამ ასაკში ეს ყველაფერი ძალიან გამიჭირდა. რთული იყო, ძალიან რთული“, - აცხადებს „ჯი-ეიჩ-ენ-თან“ საუბარში თამაზ გოგია.

18 ივლისს, თბილისის სააპელაციო სასამართლომ თამაზ გოგია იმ მკვლელობაში სცნო უდანაშაულოდ, რომლის გამოც მას 30 წლიანი პატიმრობა ჰქონდა მისჯილი. გოგია პირდაპირ სასამართლო დარბაზიდან გაათავისუფლეს.  

„მოსამართლემ განაჩენი რომ გამოაცხადა, ვეღარ ვდგებოდი, ფეხები მომეკეცა. ეს სიხარულის გრძნობა იყო თუ რა, ახლაც არ ვიცი. მთავარი ისაა, რომ ის ბრალდება მომიხსნეს, რაზეც მთელი ეს წლები ვიტანჯებოდი. მეგობარი და მისი მეუღლე მომიკლეს, როგორი გამწარებული ვარ! ესენი იყვნენ ადამიანები, რომლებიც საშინლად მიყვარდნენ, უერთმანეთოდ ვერ ვძლებდით.

წარმოიდგინეთ, მეგობრის და მისი მეუღლის მკვლელობა დამაბრალეს. ამის დაბრალების წარმოდგენა, გაფიქრებაც კი არ შეიძლებოდა. ამ ბრალით ცხოვრება, ყოფა როგორ შეიძლებოდა? ჩემი ერთადერთი მიზანი იყო ეს ბრალი მოეხსნათ.“, - აცხადებს „ჯი-ეიჩ-ენ-თან“ საუბარში გოგია.

დაკავების დღიდან ციხეში გატარებული წლების ჩათვლით, მას არცერთ ეტაპზე ბალი არ უღიარებია. ის ყველა პროცესზე ირწმუნებოდა, რომ საუკეთესო მეგობრის მკვლელი ის არ იყო, თუმცა, მაშინ მისი სიტყვები არც ბრალდებას გაუთვალისწინებია და არც მოსამართლისთვის აღმოჩნდა სარწმუნო.

„მაშინ სასამართლოზე განვაცხადე კიდეც, რაზეც გინდათ, იმაზე დამაკავეთ, ოღონდ არა ჩემი უახლოესი მეგობრის მკვლელობის გამო. რაც გინდათ, ის ჩამიდეთ, ოღონდ ორი მიცვალებულის ჩადება არ გამიგია-მეთქი... თავს ვიმხნევებდი, რომ სიმართლე გაირკვეოდა. ხელისუფლება შეიცვალა თუ არა, იმედი მომეცა, რომ საქმეს ნათელი მოეფინებოიდა. პროკურატურამ ძალიან დიდი შრომა გაწია, ყველაფერი თავიდან გამოიძიეს. სასამართლომ ყველაფერი დეტალურად, გულმოდგინედ განიხილა. გამოძიება დიდი ხანი გაგრძელდა, მაგრამ მოთმინებით ვიყავი, მინდოდა რომ ყველაფერში ბოლომდე გარკვეულიყვნენ. როგორც იტყვიან, სამართალმა იზეიმა“, - აღნიშნა „ჯი-ეიჩ-ენ-თან“ გოგიამ.

შეგახსენებთ, რომ აღნიშნული მკვლელობა 2009 წლის 11 ნოემბერს, თბილისში, მიცკევიჩის ქუჩაზე მოხდა. გენერალი თამაზ ნინუა და მისი მეუღლე, ეთერ ნინუა სახლში ჩაცხრილული საკუთარმა შვილმა იპოვა. მკვლელობაში ბრალდებულად ოჯახის უახლოესი მეგობარი, თამაზ გოგია სცნეს. სასამართლომ მაშინ შეკრებითობის პრინციპით გოგიას 69 წელიწადნახევარი მიუსაჯა, თუმცა, ასაკის გათვალისწინებით, სასჯელის ზომად 30 წელი განესაზღვრა. ხელისუფლების შცვლის შემდეგ მას ამნისტიის შედეგად 12 წელი დარჩა, საიდანაც 8 წელი მოიხადა.