"პატრიოტთა ალიანსის" წევრი გიორგი ლომაია აპირებს, რომ პარტიის ყოფილ წევრს, ირაკლი ლატარიას უჩივლოს.
ლომაიას თქმით, დღეს ყველა სხვის ხარჯზე საკუთარი თავის პიარით არის დაკავებული.
"როდესაც ასეთ ბრალდებას დებ, მოტივი ხომ უნდა არსებობდეს. როდესაც ამბობ, რომ გაგიტაცეს, გაწამეს, იმასაც ხომ უნდა ამბობდე, რას გთხოვდნენ. ვგავარ ისეთ ადამიანს, რომელიც გაიტაცებს, აწამებს, არაფერს სთხოვს და უბრალოდ ტკბება ამ პროცესით.
"ჩემი მიყვანილი არ არის პარტიაში, სანამ ჩვენ პარლამენტში მოვხვდებოდით, ვხელმძღვანელობდი უსაფრთხოების ნაწილს, ის პარტიაში მოვიდა 2015 წელს და ჩავაბარეთ ანალიტიკური სამსახური. დამთავრდა მისი პროექტი, შეწყდა კონტრაქტი, ჩვენ დავემშვიდობეთ მასაც და მის ჯგუფსაც. დამეკისრა, რომ მე გამეთავისუფლებინა სამსახურიდან. შესაბამისად უთანხმოება იყო, მაგრამ ეს ჩემი მხრიდან გატაცების მიზეზი ვერ იქნებოდა", - განაცხადა ლომიამ.
ცნობისთვის, „პატრიოტთა ალიანსის“ ანალიტიკური სამსახურის ყოფილი ხელმძღვანელი ირაკლი ლატარია, ფრაქცია „პატრიოტთა ალიანსის“ წარმომადგენელს გიორგი ლომიას, ცემასა და წამებაში ადანაშაულებს.
ლატარია ამბობს, რომ ინციდენტი 9 თვის წინ მოხდა, რა დროსაც ლომიამ და „პატრიოტთა ალიანსის“ უსაფრთხოების უფროსმა გვარად კენკებაშვილმა, პარტიის ოფისში ანგარიშსწორების მიზნით, სასტიკად სცემეს ის და ოჯახის წევრების მკვლელობით ემუქრებოდნენ.
როგორც ლატარია ამბობს, 9 თვის განმავლობაში სამართლებრივ რეაგირებას შიშის გამო ვერ ახდენდა, ახლა კი დახმარებისთვის „ახალგაზრდა იურისტთა ასოციაციას“ მიმართა. დღესვე, ლატარია მთავარი პროკურორის სახელზე, საგამოძიებო უწყებაში განცხადებას შეიტანს.
მისი თქმით, რაც შეეხება ცემის მოტივს, ეს ანგარიშსწორების გამო მოხდა, რადგან პარტიის ლიდერებს სოციალურ ქსელში, „პატრიოტთა ალიანსის“ წევრ, ნინო კვარაცხელიასთან საუბრისას აკრიტიკებდა.
"მიმოწერაში საუბარი იყო იმაზე, რომ მე აგენტობას და ათას სისულელეს მაბრალებენ, ვბრაზობდი და ვესაუბრებოდი კვარაცხელიას, ამის შემდეგ, ანალიტიკური სამსახური გაუქმდა და წამოვედი პარტიიდან. შემდეგ, მოტყუებით მიმიყვანეს, ოთახში დამაბეს და სასტიკად მცემეს. ლომია მეუბნებოდა დღეს უნდა მოკვდეო. იქ იყო კენკებაშვილი, ყოფილი პოლიციელი და კიდევ ორი უცნობი პირი. ორი ტელეფონიდან ერთი წამართვეს. 3-საათიანი ცემის შემდეგ, საპირფარეშოში გასვლის უფლება მომცეს და მეორე ტელეფონით ჩემს მეუღლეს მივწერე რაც ხდებოდა. აქამდე შვილის დაბადებას ველოდებოდი და არაფერს ვამბობდი, ლომია იმითაც დამემუქრა, წარმოიდგინე შენი ცოლი გამოდის და მანქანა ეჯახებაო. მემუქრებოდა პირადი ცხოვრების ამსახველი კადრების გამოქვეყნებითაც. ახლა ჩემი შვილი დაიბადა და გადავწყვიტე ეს ყველაფერი მეთქვა", - განაცხადა ირაკლი ლატარიამ, რომელიც ამბობს, რომ „პატრიოტთა ალიანსში“ მუშაობის დაწყებამდე „ქართული ოცნების“ აქტივისტი იყო.
მისი თქმით, ინციდენტს, რომელიც 2016 წლის ოქტომბერში მოხდა, თვითმხილველები ყავს მათ შორის კინოს სახლის დარაჯი და სხვა პირები.