აშშ-ის წამყვანმა რესპუბლიკელმა სენატორმა, ბობ კორკერმა განაცხადა, რომ კანონპროექტი, რომელიც რუსეთისთვის სანქციების გამკაცრებას გულისხმობს, ჯერ არ არის საბოლოოდ ჩამოყალიბებული. ,,რადიო თავისუფლების” ინფორმაციით, მიუხედავად ადრინდელი განცხადებებისა, რომ ორპარტიული შეთანხმება დოკუმენტის შესახებ მიღწეულ იყო. კორკერმა, რომელიც სენატის საგარეო ურთიერთობათა კომიტეტს განაგებს, რეპორტიორებს 24 ივლისს უთხრა, რომ კიდევ არის ცოტა სამუშაო. მისივე თქმით, არსებული აზრთა სხვადასხვაობა მალე მოგვარდება.
გავრცელებული ინფორმაციით, აშშ-ის კონგრესის წევრები რუსეთის, ირანისა და ჩრდილოეთ კორეის წინააღმდეგ ახალი სანქციების დაწესებაზე 22 ივლისს შეთანხმდნენ. კონგრესმენებმა იმაზეც იზრუნვეს, რომ პრეზიდენტს არ ჰქონდეს საშუალება აღნიშნული სანქციები გააუქმოს. კანონპროექტი საქართველოს სუვერენიტეტის მხარდაჭერასაც გამოხატავს.
შეთანხმების გარეშე აშშ-ის კონგრესის მიერ მოსკოვის წინაააღმდეგ სანქციების გამკაცრების გამო, ბრიუსელმა უკმაყოფილობა გამოთქვა. “Financial Times”-ის ინფორმაციით, ევროპელი პოლიტიკოსების ნაწილი მიიჩნევს, რომ ამან შესაძლოა, ევროკავშირის ეკონომიკაზე უარყოფითი გავლენა მოახდინოს.
კანონპროექტის კენჭისყრა 25 ივლისს უნდა გაიმართოს.
