საქართველოს პრეზიდენტის ადმინისტრაციის უფროსმა გიორგი აბაშიშვილმა დღეს ქართული პროდუქციის პირველი დაგროვებითი ბარათის "მოითხოვე ქართული" ერთგული მომხმარებლები დააჯილდოვა.
დაჯილდოების ცერემონია პროექტის "მოითხოვე ქართული" ფარგლებში უკვე მეორედ გაიმართა და მას გალერეამ "ვაჩე" უმასპინძლა, რომელიც აღნიშნულ პროექტში დღეს ჩაერთო.
დაგროვებითი ბარათი პრეზიდენტის ინიციატივით, საპრეზიდენტო კამპანიის "მოითხოვე ქართული" ფარგლებში პრეზიდენტის სარეზერვო ფონდის დაფინანსებით შეიქმნა და ქართული პროდუქციის პოპულარიზაციისა და გაყიდვების წახალისებას ისახავს მიზნად.
დაგროვებით ბარათზე დაგროვებული „ქართულების“ მიხედვით დღეს 8 გამარჯვებულს „ქართული პროდუქციის ერთგული მომხმარებლის“ სერტიფიკატი საქართველოს პრეზიდენტის ხელმოწერით პრეზიდენტის ადმინისტრაციის უფროსმა და თბილისის მერის მოადგილე ირაკლი ლექვინაძემ გადასცეს.
გამარჯვებულებს გიორგი აბაშიშვილმა საქართველოს პრეზიდენტის სახელით პროექტში ჩართვისა და მონაწილეობისათვის მადლობა გადაუხადა.
დაგროვებითი ბარათის პროექტს ააიპ "მოითხოვე ქართული" ახორციელებს. მომხმარებელთა წახალისებისთვის ბარათზე დაგროვებული "ქართულების" მიხედვით ყოველთვიური კონკურსი ტარდება თვის ყველაზე მეტი "ქართულების" მფლობელების გამოსავლენად.