სახელმწიფო აუდიტის დასკვნის თანახმად, გიორგი მარგველაშვილმა პრეზიდენტის სარეზერვო ფონდიდან „ჯიპას“ 282 ათასი ლარი გადაურიცხა.
პრეზიდენტმა 2015-2016 წლებში 7 პროექტი დააფინანსა. მათგან ყველაზე მეტი, 282 ათასი ლარი საზოგადოებრივ საქმეთა ინსტიტუტს (ჯიპა) გადაეცა პროექტისთვის “სახელმწიფოებრივი მოწყობის საპრეზიდენტო კოლეგიუმი”.
პრეზიდენტის სარეზერვო ფონდიდან დაფინანსებული პროექტები:
აიპ „პლატფორმა ცვლილებისათვის“ - პროექტი “ სოფლის ფოტოკლუბი პანკისი“ – 19 ათასი ლარი
აიპ „უსაფრთხო განვითარების ხიდი“ - პროექტი „გაძლიერდი და შეიცვალე“ – 13.9 ათასი ლარი
ააიპ კავშირი „საფარი“ – პროექტი „ადრეულ ქორწინებასთან ბრძოლის სტრატეგიის განსაზღვრა“ – 19,9 ათასი ლარი
აიპ „აფხაზეთის ვირტუალური არქივი“ - პროექტი „აფხაზეთის ვირტუალური არქივი“ – 95,1 ათასი ლარი
თსუ „ქართულ-ოსურ ურთიერთობათა სამეცნიერო-კვლევითი ცენტრი“ - პროექტი „ქართულ-ოსური ლიტერატურული და კულტურული ურთიერთობების ხელშეწყობისათვის“ – 58,8 ათასი ლარი
აიპ „დემოკრატიის ლაბორატორია“ - პროექტი „მე და კონსტიტუცია“ -120 ათასი ლარი
აიპ „ საქართველოს საზოგადოებრივი საქმეთა ინსტიტუტი“ - პროექტი „სახელმწიფოებრივი მოწყობის საპრეზიდენტო კოლეგიუმი“ -282,3 ათასი ლარი.
ცნობისთვის, პრეზიდენტი „ჯიპაში“ 12 წლის განმავლობაში მუშაობდა, 2006-2010 წლამდე კვლევით დეპარტმენტს ხელმძღვანელობდა, ხოლო 2010-იდან 2012 წლამდე რექტორის თანამდებობა ეკავა.
საქართველოს პრეზიდენტის ადმინისტრაციის ხელმძღვანელის, გიორგი აბაშიშვილის განცხადებით, საქართველოს პრეზიდენტის სარეზერვო ფონდებისა და ადმინისტრაციის ბიუჯეტის შესწავლა თავად ადმინისტრაციის მოთხოვნით, განხორციელდა.
”ჩვენ ვართ სახელმწიფო ხარჯებზე და მუდმივად ვკითხულობთ და გვაინტერესებს, თუ როგორ შეიძლება სახელმწიფო ხარჯების გაუმჯობესება. ეს იყო მიზეზი, თუ რატომაც ვთხოვეთ აუდიტის სამსახურს შემოსვლა. რაც შეეხება აუდიტის სამსახურის მიერ წარმოდგენილ რეკომენდაციებს, რომლებიც ეხება პრეზიდენტის სარეზერვო ხარჯებს, აქ არცერთ შემთხვევაში არ არის საუბარი, რომ რაიმე ტიპის ხარჯი იყო არასწორად გაწეული. აქ არის სარეკომენდაციო ხასიათი, თუ ბიუჯეტის რომელი ნაწილიდან ჯობდა ხარჯის გაწევა. ორივე არის ბიუჯეტის ფული მოგეხსენებათ, უბრალოდ საუბარი იყო თუ ბიუჯეტის რომელი ნაწილიდან იქნებოდა უფრო ეფექტური ხარჯის გაწევა. ჩვენ დავეთანხმეთ, რადგან ეს არანაირი პრინციპული საკითხი არ იყო”, - განაცხადა აბაშიშვილმა.
