პოლონეთის პრეზიდენტმა, ანდჟეი დუდამ განაცხადა, რომ სასამართლო სისტემის რეფორმირების შესახებ სადავო კანონს ვეტოს დაადებს.
„როგორც პრეზიდენტი არ ვგრძნობ, რომ ეს კანონი გააძლიერებს სამართლიანობის შეგრძნებას. ეს კანონი უნდა შეიცვალოს“, - განაცხადა პოლონეთის პრეზიდენტმა.
პოლონეთის პარლამენტმა სასამართლო სისტემის რეფორმირების შესახებ კანონი მიიღო, რომელმაც ქვეყნის მასშტაბით დემონსტრაციების ტალღა გამოიწვია. კანონის ძალაში შესვლისთვის პრეზიდენტის მხრიდან მისი დამტკიცებაა საჭირო.
აღნიშნულმა რეფორმამ პოლონეთის მთავრობასა და ევროკავშირს შორის ურთიერთობები დაძაბა. ევროკომისიამ განაცხადა, რომ პოლონეთს სანქციები დაუწესებდა, თუ კანონპროექტში ცვლილებები არ იქნებოდა შეტანილი.