კონგრესის მიერ მომზადებული კანონპროექტი ჩვენი პარტნიორი ქვეყნების ინტერესების დასაცავად არის მიმართული, - ამის შესახებ საქართველოში აშშ-ის ელჩმა იან კელიმ აშშ-ის კონგრესის მიერ შეთანხმებულ კანონპროექტზე კომენტირებისას განაცხადა.
მისი თქმით, კონგრესის მიერ მომზადებულ კანონპროექტში მოხსენიებული ქვეყნები, გამოირჩევიან გამუდმებული მცდელობით, დაარღვიონ სხვა ქვეყნის სუვერენიტეტი.
"ჯერ ეს არ არის კანონი. კენჭი უნდა ეყაროს და შემდეგ ხელი მოაწეროს პრეზიდენტმა, თუმცა ეს არის ძალიან მტკიცე და ნათელი გამოხატულება, თუ რა განწყობა არის ამერიკაში მათ მიმართ, ვინც ცდილობს ჩაერიოს ქვეყნის დემოკრატიულ პროცესებში და დაარღვიოს ქვეყნის სუვერენიტეტი. განსაკუთრებით ის ქვეყნები, რომლებზეც საუბარია ამ კანონპროექტში, გამოირჩევიან, გამუდმებით აქვთ მცდელობა, დაარღვიონ სხვა ქვეყნების სუვერენიტეტი და ზუსტად ეს არის ამის საპასუხო ქმედება. ჩვენ საქართველოს მთავრობასთან გვქონდა მჭიდრო კავშირი და განვიხილეთ ის საკითხები, რომ აღნიშნულმა არ დააზიანოს რაიმენაირად ჩვენი პარტნიორი ქვეყნების ინტერესები. პირიქით ეს მიმართულია მათ დასაცავად", - განაცხადა ელჩმა.
ამერიკის შეერთებული შტატების კონგრესის მიერ შეთანხმებულ კანონპროექტში, რომელიც რუსეთის წინააღმდეგ სანქციების დაწესებას ითვალისწინებს, საქართველოზეც არის საუბარი.
ევროკავშირი ვაშინგტონის მიერ რუსეთის წინააღმდეგ დაწესებულ სანქციებზე პასუხს ამზადებს.“Financial Times”-ის ინფორმაციით, ბრიუსელში უკმაყოფილოები არიან, რომ აშშ-ის კონგრესი მოსკოვის წინაააღმდეგ სანქციებს ევროკავშირთან შეთანხმების გარეშე ამკაცრებს.