ამერიკელი კანონმდებლები რუსეთის, ირანისა და ჩრდილოეთ კორეის წინააღმდეგ სანქციების გამკაცრებაზე შეთანხმდნენ. კანონპროექტი, რომელსაც სენატორები მომავალ კვირას უყრიან კენჭს რუსული ბანკების, ასევე ნავთობისა და ბუნებრივი აირის მომპოვებელი კომპანიების წინააღმდეგ ახალი შეზღუდვების შემოღებას ითვალისწინებს. დოკუმენტში ასევე ნათქვამია, რომ პრეზიდენტს აღარ ექნება სანქციების სენატის თანხმობის გარეშე გაუქმების შესაძლებლობა.
პროექტში წერია, რომ აშშ-ი განაგრძობს „ჩრდილოეთის ნაკად-2“-ის სახელით ცნობილი მილსადენის წინააღმდეგ გამოსვლას, რადგან „ის ნეგატიურ გავლენას მოახდენს ევროკავშირის ენერგოუსაფრთხოებაზე, ასევე ცენტრალური და აღმოსავლეთ ევროპის ბუნებრივი აირის ბაზრის განვითარებაზე და უკრაინის ენერგეტიკაში მიმდინარე რეფორმებზეც“.
კანონპროექტი ანალოგიურ სანქციებს ირანისა და ჩრდილოეთ კორეის წინააღმდეგ აწესებს.
რუსეთის წინააღმდეგ ახალი სანქციების დაწესების შესაძლებლობას გამოეხმაურნენ ევროკავშირშიც. ბრიუსელში ვაშინგტონს აღნიშნული ნაბიჯის ევროკავშირთან კოორდინაციისკენ მოუწოდეს. წინააღმდეგ შემთხვევაში, ევროპელი დიპლომატების თქმით, ევროკავშირის ეკონომიკისთვის ამას შესაძლოა არაპროგნოზირებადი შედეგები მოჰყვეს.