25 ივლისს, თბილისის საქალაქო სასამართლოში პატრიარქის დაცვის ყოფილი უფროსის, სოსო ოხანაშვილის დაკითხვაა დაგეგმილი. ამის შესახებ ”ჯი-ეიჩ-ენს” დეკანოზ გიორგი მამალაძის ადვოკატმა, გიორგი ფანცულაიამ განუცხადა.
”რაიმე სახის ტექნიკური ხარვეზი თუ არ იქნება, რაც პრაქტიკულად გამორიცხულია, სამშაბათს სოსო ოხანაშვილი დაიკითხება. ”სკაიპით” ჩართვას დაცვის მხარე, ანუ ადვოკატები უზუნველვყოფთ, რადგან პროკურატურის განცხადებით, ისინი ოხანაშვილთან კონტაქტზე გასვლას ვერ ახერხებენ.
საკითხავია, რამდენად დამაჯერებელია ეს ფაქტი, რომ ოხანაშვილთან დაკავშირებას პროკურატურა ვერ, დაცვის მხარე კი ახერხებს. მოგეხსენებათ, სახელმწიფო ბრალდება დაცვის მხარეზე ბევრად მეტი ბერკეტით სარგებლობს. აქედან გამომდინარე, კითხვის ნიშნები ნამდვილად არსებობს რატომ ვერ, თუ არ ახერხებენ აღნიშნული ქმედების განხორციელებას. ამასთანავე, სოსო ოხანაშვილს დაკითხვაზე უარი არასდროს უთქვამს,” - განუცხადა ”ჯი-ეიჩ-ენს” ფანცუალაიამ.
თუ რატომ შეიძლება ბრალდების მხარეს არ აწყობდეს სოსო ოხანაშვილის დაკითხვა, ამასთან დაკავშირებით ადვოკატს თავისი მოსაზრება აქვს.
”პროკურორებისგან განსხვავებით, დაუსაბუთებელ ბრალს ვერავის დავდებ, შესაბამისად, ამ ფაქტთან დაკავშირებით მხოლოდ ჩემი ვარაუდები შემიძლია გითხართ. როგორც სოსო ოხანაშვილის, ასევე სხვა დასაკითხი მოწმეების მიერ სასამართლოსთვის მისაწოდებელი ინფორმაცია შესაძლოა პროკურატურისთვის სასარგებლო არ იყოს. არაერთხელ ვთქვი და კიდევ ვიმეორებ, რომ ბრალდების მხარის მიზანი საქმეზე ჭეშმარიტი შედეგის დადგომა კი არა, გამამტყუნებელი განაჩენის მიღებაა, რასაც ყველანაირი საშუალებით ცდილობენ. თუმცა, დამიჯერეთ, სასამართლომ რა დოზითაც მოისმინა სიმართლე, საკმარისია გამამართლებელი განაჩენის გამოსატანად,” - აცხადებს ფანცუალაია.
თუ რა კონკრეტული ინფორმაცია შეიძლება სოსო ოხანაშვილმა სასამართლოს მიაწოდოს, ეს ადვოკატისთვის უცნობია. თუმცა, მისი თქმით, ოხანაშვილს საქმის გარშემო სათქმელი ნამდვილად ექნება, რადგან ის საპატრიაქროს შიდა სამზარეულოს, მათ შორის, შორენა თეთრუაშვილს, გიორგი მამალაძეს კარგად იცნობს.
”დაცვის მხარეს სოსო ოხანაშვილთან არანაირი წინასწარი მოლაპარაკება გვაქვს, რომ ვიცოდეთ რა ჩვენება შეიძლება მან მისცეს. პროკურატურისგან განსხვავებით, ჩვენ მოწმეებს წინასწარ არ ვურიგდებით და ჩვენების მონახაზს არ ვაკეთებთ. სოსო ოხანაშვილს ამ საქმესთან გადაკვეთა აქვს, რადგან ის დაცვის უფროსი იყო, საპატრიარქოს შიდა სიტუაციას თავიდან ბოლომდე იცნობს. ამას გარდა, ე.წ. ოქროს მოწმემ, გიორგი მამალაძემ საკუთარ ჩვენებაში არაერთხელ ახსენა სოსო ოხანაშვილი. აქედან გამომდინარე, მის დაკითხვას საქმეზე ჭეშმარიტების მოსაფენად ძალიან ბევრი გადაკვეთა უნდა ჰქონდეს,”- განუცხადა ”ჯი-ეიჩ-ენს” ადვოკატმა.
შეგახსენებთ, რომ პატრიარქის დაცვის ყოფილმა უფროსმა, სოსო ოხანაშვილმა საქართველო რამდენიმე თვის წინ დატოვა. არსებული ინფორმაციით, ის ამჟამად გერმანიაში იმყოფება.