საქართველოს საგარეო საქმეთა სამინისტროს განცხადებით, ისლანდიაში დაკარგული ნიკა ბეგაძის შესახებ, საქართველოს საელჩო დაუკავშირდა ისლანდიის შესაბამის სამსახურს და ამასთანავე, ისინი ოჯახთან არიან კავშირზე.
„საელჩო დაუკავშირდა Icelandic association for search and rescue (ICE-SAR), სადაც განაცხადეს, რომ ნიკა ბეგაძე დაბ. 1995 წლის 24 მაისს რუსთავში 19 ივლისს დღის 5 საათამდე შევიდა Gulfoss waterfall-ში რის შემდეგაც ითვლება დაკარგულად. მათივე განცხადებით, უკვე აღარ არის იმედი, რომ მოხდება მისი ცოცხლად პოვნა. სამძებრო სამუშაოები გრძელდება. კავშირზე ვართ ოჯახთან“, - განუცხადეს საზოგადოებრივს საგარეო უწყებაში.
ცნობისთვის, ისლანდიაში მედია წერს, რომ გულფოსის ჩანჩქერში მესამე დღეა, საქართველოს მოქალაქეს - ნიკა ბეგაძეს ეძებენ. მათივე ცნობით, ბეგაძე ქალაქ რეიკიანესბერგში ცხოვრობდა. იგი ისლანდიის მთავრობისგან თავშესაფრის მიღებას ელოდებოდა. პოლიცია მოსახლეობას სთხოვს, თუ ვინმეს აქვს რაიმე ინფორმაცია დაკარგულის შესახებ, ქალაქის სამართალდამცავ ორგანოს დაუყოვნებლივ აცნობოს.
ნიკა ბეგაძის ცარიელი მანქანა ოთხშაბათს, 19 ივლისს გულფოსის ჩანჩქერის მიმდებარე ტერიტორიაზე იპოვეს, სადაც სამძებრო ოპერაცია გრძელდება. მანქანაში ძალადობის კვალი არ აღინიშნებოდა. ადგილობრივი მედიის ინფორმაციით, პოლიცია აცხადებს, რომ ჩანჩქერში ჩავარდნის შემთხვევაში, გადარჩენის შანსი, ფაქტობრივად, არ არსებობს.
