საქართველოს პრემიერ-მინისტრ გიორგი კვირიკაშვილის განცხადებით, ტერმინალის გაფართოების შემდეგ, ქუთაისის აეროპორტი ერთდროულად ექვს რეისს მოემსახურება.
როგორც პრემიერმა მთავრობის სხდომაზე განმარტა, ტერმინალის გაფართოება, რკინიგზის ახალ პროექტთან კომბინაციაში, აეროპორტს მისცემს საშუალებას, გაცილებით მეტ მგზავრს უფრო კომფორტულად მოემსახუროს.
„ქუთაისის აეროპორტის ახალი ტერმინალის მშენებლობასთან დაკავშირებით ძალიან მნიშვნელოვანი პროექტი იწყება აგვისტოში - ტერმინალის გაფართოების პროექტი, რომელიც საშუალებას მისცემს ქუთაისის აეროპორტს ექვს რეისს მოემსახუროს ერთდროულად. ეს პროექტი რკინიგზის ახალ პროექტთან კომბინაციაში, რომელიც ითვალისწინებს სარკინიგზო ბაქნის მშენებლობას აეროპორტის ჭიშკრის წინ, ვფიქრობთ, ქუთაისის აეროპორტს მისცემს საშუალებას, გაცილებით უფრო კომფორტულად და უფრო მეტ მგზავრს მოემსახუროს.
მგზავრთა ნაკადი წლის დასაწყისიდან 92%-ით არის გაზრდილი, რაც ერთის მხრივ არის ვიზალიბერალიზაციის შედეგი, ხოლო მეორეს მხრივ, ტურიზმის მიმართულებით ძალისხმევის მნიშვნელოვანი შედეგი”, - განაცხადა გიორგი კვირიკაშვილმა.