ადმინისტრაციული რესურსები ყველა მთავრობის პირობებში უპირატესობის მოსაპოვებლად გამოიყენებოდა, - ნათქვამია NDI-ს წინასაარჩევნო დელეგაციის ანგარიშში.
როგორც ანგარიშშია აღნიშნული, პარტიებმა და არასამთავრობო ორგანიზაციებმა გამოხატეს შეშფოთება ადმინისტრაციული რესურსების გამოყენების ოთხ მთავარ ფორმაზე, რასაც, მათი აზრით, შესაძლოა ადგილი ჰქონდეს 2017 წლის ადგილობრივ არჩევნებზე: ,,ადამიანური რესურსები, როგორიცაა საჯარო მოხელეების მობილიზების დამკვიდრებული პრაქტიკა და მათი დასწრება პარტიის კამპანიის ღონისძიებებზე და მათზე ზეწოლა, ხმა მისცენ სამთავრობო პარტიას;
ფიზიკური რესურსები, როგორიცაა სახელმწიფო შენობების, სატრანსპორტო საშუალებების და აღჭურვილობის გამოყენება კამპანიის მიზნებისთვის;
ფინანსური რესურსები, როგორიცაა ადგილობრივ ინფრასტრუქტურასა და სოციალურ პროგრამებზე ხარჯების გაზრდა არჩევნების წინა პერიოდში;
სახელმწიფო უსაფრთხოების სამსახურის მიერ დაშინება და შევიწროება.
მიუხედავად იმისა, რომ ამგვარი შემთხვევების დოკუმენტირება და დადასტურება რთულია, დელეგაციასთან შეხვედრებზე თითქმის ყველამ სახელმწიფო უსაფრთხოების სამსახურის მიერ დაშინება გასული არჩევნების მთავარ და 2017 წლის არჩევნების სავარაუდო პრობლემად დაასახელა.
სავარაუდო პრობლემებად წარსულში კანდიდატების შერჩევის და ნომინირების და ფინანსების მოძიების პროცესში, კამპანიის აქტივობებში და ამომრჩეველთა მხრიდან არჩევანის გაკეთებაში სახელმწიფო უსაფრთხოების სამსახურის ჩარევა სახელდება“, - ნათქვამია ანგარიშში.
