“მეუფე პეტრეს დაკითხვამ დაადასტურა, რომ არცერთი მხარის მოწმე არაა, განსხვავებით სხვა მოწმეებისგან”, - ამის შესახებ ე.წ. ციანიდის საქმეზე ბრალდებული დეკანოზის გიორგი მამალაძის ადვოკატმა, გიორგი ფანცულაიამ განაცხადა.
ფანცულაიას თქმით, დეკანოზი გიორგი მამალაძე პატრიარქის მდივან-რეფერენტის შორენა თეთრუაშვილის მსხვერპლია.
„მისთვის ამოცანა არ იყო, რომელიმე მხარისათვის სასურველი პასუხები გაეცა. მან მაქსიმალურად ჭეშმარიტი ინფორმაცია მიაწოდა სასამართლოს, რომ სასამართლოს გაუადვილდეს ობიექტური გადაწყვეტილების გამოტანა. აქედან გამომდინარე, გამოვყოფდი რამდენიმე საკითხს, მაგალითად, ერთ-ერთი შეიძლება გამოვყო, რომ მან დეტალურად არა, მაგრამ რამდენიმე ფაქტი ნამდვილად იცოდა, რომ მამა გიორგი მამალაძე იკვლევდა ქონებრივ საკითხებს, მათ შორის, სულხან მოლაშვილის სახლთან დაკავშირებით. ასევე, კიდევ რამდენიმე საკითხზე ისაუბრა. ასევე მან თქვა რომ ის ფლობს საპატრიარქოში არსებულ სიტუაციას და მათ შორის შორენა თეთრუაშვილის მოქმედებებს საპატრიარქოში, ვის რა დავალებებს აძლევს და ა.შ. ის უკეთებს საპატრიარქოში არსებულ სიტუაციას ანალიზს. რაც შეეხება პროკურორების მხრიდან არაერთხელ იყო მცდელობა, რომ მისთვის დაესვათ ისეთი შეკითხვა რომელიც რეალურად შეცდომაში შეყვანას ემსახურება, თითქოს მან სადღაც გააკეთა რაღაცა განცხადება, რომელსაც დამახინჯებულად აწვდიან. ასევე, მან თითქოს ჩვენებაში სულ სხვანაირად უპასუხა წინასწარ გამოძიებაში და სულ სხვანაირად უსვამდნენ შეკითხვებს, ანუ მათი მცდელობა იყო, რომ მაქსიმალურად ის გამოეყვანათ მწყობრიდან და მიეღოთ მათთვის სასურველი პასუხები, რასაც დაცვის მხრიდან გარკვეული პოლემიკა ყვებოდა, მაგრამ რაც მთავარია, დამთავრდა მისი დაკითხვა ისეთი სახით, რომ სასამართლომ მიიღო მაქსიმალურად რეალური და ჭეშმარიტი ინფორმაცია საპატრიარქოში არსებულ მდგომარეობაზე“, - აღნიშნა ადვოკატმა.
