თანამდებობიდან გათავისუფლებული მარალჩინოსნების საკითხზე, მუხთარლის საქმის გამოძიების შემდეგ იქნება მსჯელობა, - ამის შესახებ დევნილთა მინისტრმა სოზარ სუბარმა განაცხადა.
,,ერთი შემიძლია, კიდევ ერთხელ გავიმეორო, რომ თბილისის ცენტრში ადამიანი მოიტაცონ ეს არის უბრალოდ გამორიცხული. ასეთი რამე ვერ მოხდება და არ მოხდება - შესაბამისად, გამოძიება რას დაადგენს, საიდან წავიდა, როგორ მოხდა საზღვრის გადაკვეთა, ეს ყველაფერი დადგინდება, თუმცა ამასობაში, მინისტრმა მიიღო გადაწყვეტილება იმისთვის, რომ გამოძიების მიმართ არ დარჩეს რაიმე კითხვა და რაიმე ეჭვი. ამიტომ, ის თანამდებობის პირები ვისაც შესაძლოა, რაიმე უშუალო კავშირი ჰქონდეს საქმესთან, ანუ როცა ლაპარაკია, როგორ გადაკვეთა საზღვარი ან რა მოხდა საერთოდ, ის ადამიანები დროებით ჩამოშორდნენ თანამდებობებს. როცა გამოძიება დასრულდება, იმის შემდგომ იქნება მიღებული შესაბამისი გადაწყვეტილება“ - განაცხადა სოზარ სუბარმა.
აზერბაიჯანელი ჟურნალისტის აფგან მუხტარლის საქმეზე, შესაბამისი სამსახურების ხელმძღვანელების თანამდებობებიდან გათავისუფლების შესახებ განცხადება შს მინისტრმა გუშინ გააკეთა. მისი თქმით, შსს-ს სასაზღვრო პოლიციის უფროსი და სახელმწიფო უსაფრთხოების სამსახურის კონტრდაზვერვის დეპარტამენტის დირექტორი, გამოძიების დასრულებამდე, დაკავებულ თანამდებობებს ტოვებენ.
