საქართველოს თავდაცვის მინისტრის, ლევან იზორიას განცხადებით, მომწოდებელმა, რომელიც თავდაცვის უწყებას ხორცით ამარაგებს, სამინისტროს შეატყობინა, რომ ბაზარზე ქართული პროდუქციის დეფიციტია, ამიტომაც, გადაწყდა ქართული ჯარი ადგილობრივი წარმოების საქონლის ხორცის ნაცვლად, უკრაინული პროდუქტით მომარაგება.
მინისტრმა აღნიშნული განცხადება გააკეთა მედიაში გავრცელებული ინფორმაციის შემდეგ, რომ თავდაცვის სამინისტომ, ქართული ჯარის საქონლის ხორცით მომარაგებასთან დაკავშირებით ტენდერში გამარჯვებულ უკრაინულ კომპანიასთან 1,64-მილიონიანი კონტრაქტი გაფორმდა და ადგილობრივი ბაზარი მეზობელმა ქვეყანამ ჩაანაცვლა.
"მიმწოდებელმა, რომელიც ამარაგებს ხორცით თავდაცვის უწყებას, წერილობით მიმართა სამინისტროს, რომ ბაზარზე ქართული პროდუქციის დეფიციტია და ვხედავთ დიდ რისკებს ქართული ჯარის უწყვეტად მომარაგების თვალსაზრისით. ეს არამხოლოდ მომარაგების, არამედ ქვეყნის უსაფრთხოების თემაა. სწორედ ამ რისკის თავიდან აცილების მიზნით, ჩვენ მივიღეთ ადეკვატური გადაწყვეტილება“, -აღნიშნა იზორიამ.