ხელახალი გამოძიებით დადგინდა, რომ თამაზ გოგია უდანაშაულო იყო, - ამის შესახებ თამაზ ნინუასა და მისი მეუღლის მკვლელობის საქმეზე დაკავებული თამაზ გოგიას ადვოკატმა, გია ჯოგლიძემ განაცხადა.
ადვოკატის განმარტებით, ექსპერტებმა დაადგინეს, რომ დენთის კვალი თამაზ გოგიას ხელიდან აღებულ ანაწმენდებზე არ აღინიშნებოდა.
"მაშინ საქმეში იყო მოწმეების ჩვენებები, გარკვეული ექსპერტიზის დასკვნები, მათ შორის უმთავრესად მიიჩნიეს დენთის კვალის არსებობა თამაზ გოგიას ხელზე. თუმცა, მაშინ ნივთიერებების აღმოჩენა ჩაითვალა დენთის კვალად. ამასთან, ამოღებული იქნა "პარლამენტის" წვრილი სიგარეტის ღერის ნამწვი, თუმცა მასზე ადამიანის გენეტიკური კვალი საკმარისი ვერ იქნა აღმოჩენილი. ასევე ბინიდან, რომელიც თამაზ გოგიას ჰქონდა ნაქირავები, ამოიღეს წიგნი "ცეცხლსასროლი იარაღი" და მასში სხვა იარაღებთან ერთად იმ იარაღზე იყო ინფორმაცია, საიდანაც მოხდა გასროლა. სასამართლომ მაშინ ჩათვალა, რომ ასეთი განაჩენი უნდა გამოეტანა. ვფიქრობ, რომ მაშინ ადგილი ჰქონდა სასამართლოს შეცდომას. ჩვენ მაშინ გავასაჩივრეთ სააპელაციო სასამართლოშიც და უზენაესშიც, თუმცა უშედეგოდ. როცა ჩატარდა ახალი ექსპერტიზები, დაადგინეს ამ ექსპერტებმა, რომ არავითარი დენთის კვალი თამაზ გოგიას ხელიდან აღებულ ანაწმენდებზე არ აღინიშნებოდა",- განაცხადა თამაზ გოგიას ადვოკატმა.
შეგახსენებთ, რომ საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის შუამდგომლობით, 2017 წლის 18 ივლისს, თბილისის სააპელაციო სასამართლომ გენერალ თამაზ ნინუას და მისი მეუღლის ეთერ ნინუას მკვლელობისთვის მსჯავრდებულ თამაზ გოგიას მიმართ გამამართლებელი განაჩენი დაადგინა და სასამართლო სხდომის დარბაზიდან გაათავისუფლა.