შინაგან საქმეთა მინისტრის მოადგილის, შალვა ხუციშვილის განცხადებით, თათია დოლიძის მიმართ განხორციელებული მუქარის ფაქტზე დაიკითხება ყველა, ვინც დასაკითხია.
მისივე თქმით, ვერ შეაფასებს, არის თუ არა ვინმეს ქმედებაში დანაშაულის ნიშნები.
„მთავარია ის, რომ ჩვენ ვართ თავისუფალი ქვეყანა და პოლიცია მოწოდებულია იმისათვის, რომ თავისუფლება უზრუნველყოს. ვინც დასაკითხია, ყველა დაიკითხება და შესაბამისი ღონისძიებები გატარდება“, - განაცხადა ხუციშვილმა.
შეგახსენებთ, რომ 16 ივლისს ე.წ. ქართველთა მარშის ორგანიზატორები გაეროში საქართველოს ყოფილ ახალგაზრდა ელჩს თათია დოლიძეს Fb-სტატუსის გამო ჯგუფური გაუპატიურებით დაემუქრნენ. მოგვიანებით, მათ Facebook-ის პოსტი და კომენტარები წაშალეს და განაცხადეს, რომ ყალბი გვერდების მეშვეობით სხვები იმუქრებოდნენ.
თათია დოლიძის მიმართ სოციალური ქსელით გავრცელებული სავარაუდო მუქარის ფაქტზე შსს-ს მიერ გამოძიება სსკ-ს 151-ე მუხლით დაიწყო.