პრეზიდენტმა ბოდიში უნდა მოიხადოს თავისი მოხელის გადაცდომის გამო, - ამის შესახებ  პარლამენტის ფრაქცია "ქართული ოცნების" თავმჯდომარე მამუკა მდინარაძე აცხადებს.

,,ოპოზიციურ ფრთაზე მიკერძოებული უნდა იყო, რომ ირაკლი კობახიძის განცხადებებში პარტიული დავალებები ამოიკითხო. ეს უკვე ინტერპრეტირების აქამდე ცნობილ ფარგლებსაც კი სცილდება. გარდა ამისა, პრეზიდენტის ადმინისტრაციის მოხელის ეს განცხადება შეურაცხყოფას აყენებს, როგორც საქართველოს პარლამენტის თავმჯდომარეს, ასევე, მთლიანად დიპლომატიურ კორპუსს, რომელსაც პრეზიდენტის მხარე პარტიულ აქტივად მოიხსენიებს. სწორედ ამის გამო, წესით, პრეზიდენტმა ბოდიში უნდა მოიხადოს თავისი მოხელის გადაცდომის გამო, რომელმაც პარლამენტის თავმჯდომარე და დიპლომატიური კორპუსი შეურაცხყო", - განაცხადა მამუკა მდინარაძემ.

საქმე ეხება ირაკლი კობახიძის მიერ "ამბასადორიალი 2017"-ის შეხვედრაზე ელჩებისთვის საკონსტიტუციო რეფორმის შესახებ ინფორმაციის მიწოდებასას გაკეთებულ განცხადებას. კობახიძემ თქვა, რომ საკონსტიტუციო რეფორმაზე მომუშავე კომისიაში პრეზიდენტის წარმომადგენლების ჩაურთველობა "აბსოლუტურად დაუსაბუთებელი იყო". თენგიზ ფხალაძემ კობახიძის განცხადებას ელჩებისთვის "პარტიული დავალების მიცემა" უწოდა.