„ცენტრ პოინტის“ საქმეზე მსაჯვრდებულ დებს, მაია რჩეულიშვილს და რუსუდან კერვალიშვილს შესაძლოა საპროცესო შეთანხმება გაუფორმონ. ამის შესახებ „ჯი-ეიჩ-ენს“ მათმა ადვოკატმა, მარინა ცუცქირიძემ განუცხადა.
„საპროცესო შეთანხმებასთან დაკავშირებით აქტიურად ვმუშაობთ. ეს საკმაოდ შრომატევადი პროცესია, ამიტომ დღეს, ან ხვალ არ დასრულდება. ეს არ არის ჩვეულებრივი საპროცესო შეთანხმება, რომელიც ერთ კონკრეტულ დანაშაულს ეხება. ეს არის საქმე, რომელიც ათასობით ადამიანის პრობლემის გადაჭრას გულისხმობს. ვვარაუდობ, რომ საპროცესო შეთანხმება სექტემბრამდე გაფორმდება და ამის ერთ-ერთი პირობაა, ორივე და გაათავისუფლონ,“ - განუცხადა „ჯი-ეიჩ-ენს“ ცუცქირიძემ.
ადვოკატი დღეს მაია რჩეულიშვილს ციხეში შეხვდა.
„აქტიურად ვიმუშავეთ. ჩვენ ყოველდღიურად ვმუშაობთ, ის თავის გეგმებს გვაცნობს, წინადადაებებს გვთავაზობს ვისთან შეიძლება მოლაპარაკება, ვისთან შეიძლება კონკრეტული ხელშეკრულებების გაფორმება და ა.შ. მიუხედავად იმისა, რომ ციხეშია, მოლაპარაკებებში აქტიურადაა ჩართული“, - აცხადებს ადვოკატი.
რაც შეეხება დაზარალებულების ინტერესების დაკმაყოფილებას, როგორც ცუცქირიძე ამბობს, მათი უმთავრესი ამოცანა სწორედ ეს არის.
„აქამდე იყო წინადადება, რომ მშენებლობების ნაწილი „ცნეტრ პოინტს“, ნაწილი კი ინვესტორს უნდა დაემთავრებინა. ახლა შეიცვალა პირობა და შეიძლება მთლიანად ინვესტორმა გააკეთოს ეს. უმთავრესი პირობაა, რომ დაზარალებულების მდგომარეობა გაუმჯობსდეს, მათ უნდა მიიღონ ის ქონება, რომელიც შეიძინეს. როცა პროკურატურა დაინახავს, რომ ეს რეალურად ხდება, რა თქმა უნდა, რჩეულიშვილები უნდა გათავისუფლდნენ,“ - განაცხადა ცუცქირიძემ.
რაც შეეხება მაია რჩეულიშვილის ჯანმრთელობის მდგომარეობს, ადვოკატის განცხადებით, რჩეულიშვილი კვლავ ციხის საავადმყოფოში რჩება.
„ამ მხრივ არანაირი ცვლილებაა, სიმსივნური წანაზარდი, რაც ჰქონდა, ისევ აქვს, ოპერაცია არ ჩატარებია. მედიკამენტური მკურნალოიბა მას ყოველდღიურად უტარდება,“ _ აღნიშნა „ჯი-ეიჩ-ენთან“ საუბარში ადვოკატმა.