კრასნოდარელი მოსამართლის, ელენა ხახალევას ქალიშვილის ქორწილმა სრულიად რუსეთი აალაპარაკა. მასზე რუსული ესტრადის თითქმის ყველა ვარსკვლავმა იმღერა. მათ შორის იყო რუსეთში მოღვაწე ქართველი მომღერალი სოსო პავლიაშვილიც, რომელიც აცხადებს, რომ ქორწილში უფასოდ იმღერა.
„ვიღაცამ თქვა, რომ 400 ათასი ევრო მომცეს. ამხელა ფული ცხოვრებაში არ მინახავს. ქართველები რუსეთში ცოტანი ვართ და ერთმანეთს პატივს ვცემთ. კრასნოდარში სომეხი მეგობრებისთვის ვიმღერე და შემდეგ მთხოვეს, ამ ქორწილშიც მემღერა. ჩემმა მეგობარმა მთხოვა და რა თქმა უნდა, დავთანხმდი ყოველგვარი გადახდის გარეშე. გამოსვლაში 500 ათასს რომ მიხდიდნენ, მსოფლიოში უბედნიერესი ადამიანი ვიქნებოდი,“-აღნიშნა პავლიაშვილმა.
მოსამართლის ქალიშვილის მდიდრულ ქორწილს საზოგადოებაში არაერთგვაროვანი რეზონანსი მოჰყვა. საზოგადოების დიდი ნაწილი იმით დაინტერესდა, თუ საიდან ჰქონდა საოლქო მოსამართლეს მილიონები, რომელიც ქორწილში დახარჯა.
