ოპოზიციური პარტიები პრეზიდენტს ვეტოს უფლების გამოყენებას სთხოვენ. ამ შემთხვევაში საუბარია ორ კანონზე - თვითმმართველობის კოდექსში შესატან ცვლილებებზე, რომლის მიხედვითაც თვითმმართველ ქალაქთა რაოდენობა 12-დან 5-მდე მცირდება და საარჩევნო კოდექსში შესატან იმ ცვლილებაზე, რომელიც საარჩევნო ადმინისტრაციების დაკომპლექტების წესს ცვლის.
აღნიშნულ საკითხებზე შეხვედრა პრეზიდენტის სასახლეში ამ წუთებში მიმდინარეობს. შეხვედრას როგორც საპარლამენტო, ისე არასაპარლამენტო ოპოზიციური პარტიების წარმომადგენლები ესწრებიან.
ისარგებლებს თუ არა პრეზიდენტი კანონით მინიჭებული უფლებით და იქნება თუ არა ერთდროულად ორი ვეტო - გადაწყვეტილება გიორგი მარგველაშვილმა 21 ივლისამდე უნდა მიიღოს. პრეზიდენტის ადმინისტრაციაში აცხადებენ რომ საბოლოო გადაწყვეტილებას გიორგი მარგველაშვილი პოლიტიკურ ძალებთან და არასამთავრობო სექტორთან კონსულტაციების შემდეგ მიიღებს.