დაკარგული ტყუპი ძმები, ნიკა და ლუკა ცანავები უკვე სახლში არიან და თავს კარგად გრძნობენ. ისინი სამართალდამცავებმა რამდენიმე საათის წინ მიიყვანეს მშობლებთან. როგორც ”ჯი-ეიჩ-ენს” ტყუპების ძმამ, გიორგი ცანავამ განუცხადა, მოზარდები ზღვაზე გაპარვას დიდი ხნის განმავლობაში გეგმავდნენ.
”ეს ყველაფერი წინასწარ დაუგეგმავთ, უნდოდათ ზღვაზე მარტოები წასულიყვნენ. ეს სახლში რომ ეთქვათ, იცოდნენ ბათუმში მარტო არ გაუშვებდნენ და ფულსაც ჩუმად აგროვებდნენ. სამივეს ერთად 150 ლარი შეუგროვებიათ. დიდუბეში, ბათუმის სამარშუტო ტაქსისთვის დაუქნევიათ ხელი. სულ ორი-სამი ადამიანი იჯდა და ჩვენც ავხტითო, მითხრეს ბავშვებმა. ტყუპები კიდევ ერთ მეგობართან ერთად იყვნენ. სწორედ მისი იდეა ყოფილა ბათუმში წასვლა. ესენიც დაეთანხმნენ”,- განუცხადა ”ჯი-ეიჩ-ენს” ტყუპების ძმამ, გიორგი ცანავამ.
მისივე თქმით, მოზარდები სახლში დაბრუნებას დღეს აპირებდნენ, თუმცა, მშობლების ეშინოდათ.
”ღამე სადღაც მშენებარე კორპუსში გაუთენებიათ, დაცვის თანამშრომლეთან დარჩენილან. როგორც ჩანს, ფულს ზოგავდნენ. სახლში მოსვლა გვეშინოდა, თორემ კი ვფიქრობდით დარეკვასო, მითხრეს ბავშვებმა. თურმე დღეს აპირებდნენ უკან დაბრუნებას. დაცვის თანამშრომლებმა იპოვეს ბათუმის ბულვარში, შემდეგ კი პოლიციას დაურეკეს,”- აცხადებს გიორგი ცანავა.
