პატიმრობიდან გირაოს სანაცვლოდ გათავისუფლებულმა მსახიობმა, გიორგი გიორგანაშვილმა მოძრაობა „თეთრი ხმაურის“ ოფისში ბრიფინგი გამართა. მსახიობმა უფლებადამცველებთან ერთად დაკავებისას და ციხეში ყოფნისას მის მიმართ განხორციელებულ ზეწოლასა და ზოგადად, ქვეყანაში არსებულ ნარკოპოლიტიკაზე ისაუბრა.
„დიდი მადლობა ყველას, ვინც ციხიდან ჩემი გამოყვანის პროცესში მონაწილეობა მიიღო. დაკავების პროცესში ჩემი უფლებები დაირღვა. ფაქტობრივად, უფლებების რა ნუსხაც არსებობს, იქიდან არცერთი შესრულებულა, ადგილზე არც ოქმი შეუდგენიათ, არც მოწმეები დაუკითხავთ. არადა შეეძლოთ ტაქსის მძღოლი, ან თუნდაც, გამვლელები გაეჩერებინათ და მოწმის სახით ისინი ჰყოლოდათ, ან ადვოკატი მოსულიყო“, - განაცხადა გიორგანაშვილმა.
მან იმ ფსიქოლოგიურ ზეწოლაზეც ისაუბრა, რასაც ციხის დაწესებულებაში მასზე ანხორციელებდნენ.
„ციხის შიდა განაწესით, კარანტინის პერიოდში მაქსიმუმ, ერთი თვის განმავლობაში შეუძლიათ დარეკვის უფლება არ მოგცენ, მაგრამ ეს 6 თვის განმავლობაში გაგრძელდეს, ყოვლად დაუშვებელია. კომუნიკაციის აკრძალვით ჩემზე ფსიქოლოგიურ ზეწოლას ახდენენ. მხოლოდ ადვოკატებთან და კამერის მეგობრებთან კომუნიკაციის საშუალება მქონდა.
კითხვაზე, სხვა სახის ზეწოლას ჰქონდა თუ არა ადგილი მის მიმართ, მსახიობმა განაცხადა, რომ პროკურატურის მხრიდან ზეწოლა სულ ხორციელდებოდა. გიორგანაშვილის განცხადებით, ის არალიბერალური ნარკოპოლიტიკის მსხვერპლია და სასჯელაღსრულების დაწესებულებაში ყოფნისას მის მდგომარეობაში მყოფ ბევრ ადამიანს წააწყდა.
„ძალიან ბევრი ადამიანი შემხვდა ციხეში რომელთაც ანალოგიური პრობლემა აქვთ და ასეთი მხარდაჭერა არ აქვთ. ამ ადამიანებს სასამართლო პროცესების პერიოდში, ან მოსაცდელ ოთახებში როცა ვხდებოდი, მთხოვდნენ მათი პრობლემაც გამეჟღერებინა,“ - განაცხადა გიორგანაშვილმა.
ის ქვეყანაში არსებულ ნარკოპოლიტიკის შეცვლას ითხოვს.
შეგახსენებთ, რომ ნარკოდანაშაულში ბრალდებული მსხიობი თბილისის საქალაქო სასამართლომ 14 ივლისს 20 000 ლარიანი გირაოს სანაცვლოდ გაათავისუფლა.