თითქმის 2 დღიანი ძებნის შემდეგ, სამართალდამცავებმა ნიკა და ლუკა ცანავების კვალს ბათუმში მიაკვლიეს. ისინი ამ წუთებში თბილისში მოჰყავთ. ამის შესახებ ”ჯი-ეიჩ-ენს” ტყუპების ძმამ, გიორგი ცანავამ აცნობა.
”დაახლოებით, ერთი საათის წინ იპოვეს. თავს კარგად გრძნობენ, ზღვაზე იყვნენ გაპარულები. ეს რატომ გააკეთეს არ ვიცი. მთავარია, რომ ცოცხლები და ჯანმრთელები არიან. მათ წამოსაყვანად ჩვენ გვინდოდა წასვლა, მაგრამ სამართალდამცავებმა გვითხრეს, ჩვენ უნდა ჩამოვიყვანოთო. სავარაუდოდ, უკვე გზაში იქნებიან. აქვე ყველას, ვინც მათ ძებნაში, ამ ინფორმაციის გავრცელებაში, დაგვეხმარა, მათ შორის თქვენს მთელ გუნდს, დიდ მადლობას ვუხდით”, - განუცხადა ”ჯი-ეიჩ-ენს” გიორგი ცანავამ.
