ამ წუთებში სამართალდამცავებს დაკარგული ტყუპი ძმები ბათუმიდან თბილისში მოჰყავთ. ლუკა და ნიკა ცანავები დაახლოებით, ერთი საათის წინ იპოვეს. ამის შესახებ ”ჯი-ეიჩ-ენს” ტყუპების ძმამ, გიორგი ცანავამ განუცხადა.
”თავს კარგად გრძნობენ, ზღვაზე იყვნენ გაპარულები. ეს რატომ გააკეთეს არ ვიცი. მთავარია, რომ ცოცხლები და ჯანმრთელები არიან. მათ წამოსაყვანად ჩვენ გვინდოდა წასვლა, მაგრამ სამართალდამცავებმა გვითხრეს, ჩვენ უნდა ჩამოვიყვანოთო. სავარაუდოდ, უკვე გზაში იქნებიან. აქვე ყველას, ვინც მათ ძებნაში, ამ ინფორმაციის გავრცელებაში, დაგვეხმარა, მათ შორის თქვენს მთელ გუნდს, დიდ მადლობას ვუხდით”, - განუცხადა ”ჯი-ეიჩ-ენს” გიორგი ცანავამ.
შეგახსენებთ, რომ დაკარგულ მოზარდებს ოჯახის წევრები და სამართალდამცავები 12 ივლისიდან ეძებდნენ.