თქვენ ჩარჩით წარსულში და ამ საწყალ ზალიკოსაც ჩაიყოლებთ, - ამის შესახებ "ევროპული საქართველოს" ლიდერი, გიგი უგულავა Facebook-ის პირად გვერდზე, "ნაციონალური მოძრაობის" ლიდერის, ნიკა მელიას მისამართით წერს, რომელმაც განაცხადა, რომ "ქართულმა ოცნებამ", ერთი მხრივ "ნაციონალური მოძრაობისთვის" ტყის სანიტრის ფუნქცია შეასრულა, ანუ მოაშორა ის ხალხი, რომელიც წინსვლისთვისა და ქვეყნისთვის მეტი სიკეთის მოსატანად დაბრკოლება იყო.
როგორც უგულავა წერს, ნიკა მელიას მან გაუხსნა "ნაციონალურ მოძრაობის" კარი, მაგრამ მისთვის უტიფრობა არ უსწავლებია.
"ბრიყვი დაასაქმე და უკან მიყევიო", ამ პერსონაჟზეა ნათქვამი. თვითკრიტიკულიც ვარ - მე გავუხსენი მას ნაცმოძრაობის კარი, მაგრამ უტიფრობა არ მისწავლებია.
მე შაირი არ მინდოდა ... არც თქვენთან დავას ვაპირებ. ჩვენი ფოკუსი ივანიშვილი და მისი კორუმპირებული ბალაგანია. იმის მაგივრად, რომ მეორე ტურისთვის ერთმანეთისკენ გზები ბოლომდე არ დაგვეწვა, წარსულის უმეცარ ფალსიფიკაციას ეწევით. თქვენი არჩევანია, ჩვენ წინ ვიყურებით, თქვენ ჩარჩით წარსულში და ამ საწყალ ზალიკოსაც ჩაიყოლებთ", - წერს უგულავა.
