„ბექა შენგელიას გლდანის მე-8 დაწესებულებში გუშინ შევხვდი. ის სასამართლოს გადაწყვეტილებით რა თქმა უნდა, უკმაყოფილოა, თანახმაა ეს განაჩენი გავასაჩივროთ“, - განაცხადა „ჯი-ეიჩ-ენ“-თან საუბარში შენგელიას ადვოკატამა, ლალი ბიწოშვილმა.
მისი თქმით, თბილისის საქალაქო სასამართლოს მიერ გამოტანილი გადაწყვეტილება, რომლის მიხედვითაც ბექა შენგელიას უვადო თავისუფლების აღკვეთა მიესაჯა, უკანონოა. მას შემდეგ, რაც აღნიშნული საქმე საქართველოში ყველა ინსტანციას მოივლის, ბიწოშვილი მას სტრასბურგშიც გაასაჩივრებს.
რაც შეეხება იმას, თუ რის საფუძველზე მიესაჯა ბექა შენგელიას უვადო თავისუფლების აღკვეთა იმის ფონზე, როცა მას კანიბალიზმი არ დაუდასტურდა, ადვოკატს ამ ეტაპისთვის პასუხის გაცემა უჭირს.
„ჯერ დასაბუთებულ განაჩენს ველოდები, რომელიც გარკვეული პერიოდის განმავლობაში ჩამბარდება. დაახლოებით, 45 ფურცლიანი დაცვითი სიტყვა მქონდა, რომელიც მთლიანად მტკიცებულებებზე იყო აგებული. აქედან მოსამართლემ რა გაიზიარა და რა არა, სანამ ეს დასაბუთებული განაჩენი არ ჩამბარდება, პასუხს ვერ გაგცემთ... დარწმუნებული ვარ, სააპელაციო სასამართლო კანონიერ გადაწყვეტილებას მიიღებს. ის დანაშაული _ კანიბალიზმი, ადამიანების ორგანოების შეჭმა, რასაც ბექა შენგელიას ედავებოდნენ, არ დაუმტკიცდა, ამ ნაწილში ის გამართლდა, რაც თავისთავად სასჯელზეც უნდა ასახულიყო. როცა რომელიღაც ნაწილში ადამიანი გამართლებულია, როგორ შეიძლება მას უვადო პატიმრობა მიუსაჯო? ბექა შენგელია მთელმა საქართველომ როგორც კანიბალი, ისე შერაცხა და ამ საქმესაც კანიბალების საქმე დაერქვა. თუმცა, ვიმეორებ ის ამ ნაწილში გამართლდა. ირმა ყოჩიაშვილს 20 წლიანი პატიმრობა შეეფარდა. მან თავისი დანაშაული მთლიანად აღიარა. ისმის კითხვა, თუ ირმა ყოჩიაშვილმა დანაშაული აღიარა და თქვა, რომ მან მოკლა, მან დაჩეხა საკუთარი დედა და ბექას კანიბალიზმი მოუხსნეს, ამის ფონზე რა დანაშაული დარჩა მას, საზოგადოებამ გამცეს პასუხი“, - აცხადებს ბიწოშვილი.
„ჯი ეიჩ ენ“-თან საუბარში შენგელიას ადვოკატი ამბობს, რომ მისი დაცვის ქვეშ მყოფს ლუბა ყოჩიაშვილის მკვლელობაში მონაწილეობა არ მიუღია.
„ის ირმა ყოჩიაშვილს მკვლელობის შემდეგ, დაჩეხილი ლუბა ყოჩაიშვილის ცხედრის გადამალვაში, გლდანის ნაგავ საყრელზე წაღებაში დაეხმარა. ეს არის მისი დანაშაული, რაც მას უმტკიცდება თუნდაც ნაგავსაყრელზე ნაპოვნი სიგარეტის ნამწვავით“, - დასძინა ადვოკატმა.
რაც შეეხება ბექა შენგელიას აღიარებით ჩვენებას, როგორც მისი უფლედამცველი ამბობს, ის ირმა ყოჩიაშვილის და ნინა ჩიკვაიძის გადასარჩენად მისცა. კანონით კი, აღიარებითი ჩვენება თუ ის მტკიცებულებებით არ მყარდება, არ შეიძლება განაჩენის გამოტანის საფუძველი გახდეს.
შეგახსენებთ, რომ გახმაურებული სასტიკი მკვლელობა გასული წლის 19 ოქტომბერს, ბერი გაბრიელ სალოსის ქუჩაზე მოხდა. 2016 წლის 3 ნოემბერს, სამართალდამცავებმა 76 წლის ლუბა ყოჩიაშვილის დამამძიმებელ გარემოებაში ჯგუფურად განზრახ ჩადენილი მკვლელობის საქმეზე 3 პირი, ბექა შენგელია, გარდაცვლილის შვილი, ირმა ყოჩიაშვილი და ნინა ჩიკვაიძე დააკავეს. გამოძიება ბექა შენგელიას მსხვერპლის სხეულის ორგანოს სხვაგვარად გამოყენებას ედევბოდა.
ამავე მკვლელობის საქმეზე სამართალდამცავებმა კიდევ 3 პირი, დანაშაულის შეუტყობინებლიობისთვის დააკავეს. ბექა შენგელიას უვადო თავისუფლების აღკვეთა, ირმა ყოჩიაშვილს 20 წლიანი, ნინა ჩიკვაიძეს კი 8 წლიანი თავისუფლების აღკვეთა მიესაჯა.