შინაგან საქმეთა მინისტრის მოადგილის, შალვა ხუციშვილის განცხადებით, ივლისის ბოლოდან დედაქალაქსა და ავტობანებზე დაიწყება ე.წ. ჭკვიანი კამერების დამონტაჟება, რაც წარმოადგენს ვიდეომეთვალყურეობის სპეციალურ სისტემას, რომელიც აღჭურვილია ვიდეოანალიტიური პროგრამული უზრუნველყოფით. შესაბამისად ის აფიქსირებს იმ დარღვევებს, რაც დამახასიათებელია იმ კონკრეტული მონაკვეთისთვის.
მინისტრის მოადგილის განცხადებით, სისტემას აქვს საშუალება, დარღვევა ავტომატურ რეჟიმში დააფიქსიროს. შალვა ხუციშვილის თქმით, თბილისში მსგავსი სისტემა 10 ლოკაციაზეა დამონტაჟებული და თითოეული დღეღამეში მინიმუმ 100-120 დარღვევას აფიქსირებს. ხუციშვილის განცხადებით, მთელი ქვეყნის მასშტაბით ამ სისტემის დამონტაჟების შემდეგ, ვიდრე მოქალაქეები წესრიგს მიეჩვევიან, ვიდეოჯარიმების რაოდენობა გაიზრდება. ამიტომ იქ, სადაც ადმინისტრირება მკაცრდება, მოქალაქეებს უნდა ჰქონდეთ გონივრული შეღავათების უფლება. ხუციშვილის განმარტებით, სწორედ ამიტომ იქნა შემოთავაზებული ახალი სისტემა, რომელიც პირველ რიგში გულისხმობს, რომ საგზაო მოძრაობის წესებზე დაკისრებული ჯარიმების აღსრულება გარდაუვალი ხდება.
ხუციშვილის განმარტებით, 2016 წელს ვიდეოჯარიმების რაოდენობამ ქვეყნის მასშტაბით 340 ათასი ლარი შეადგინა და ეს მაჩვენებელი ყოველწლიურად 40-50 ათასით იზრდება.