ფინანსთა მინისტრის მოადგილემ ნიკოლოზ გაგუამ მისასალმებელი მოხსენება გააკეთა სამუშაო შეხვედრაზე „მცირე და საშუალო საწარმოების დაფინანსების გზები და მათი საქმიანობის ხელშეწყობა“. რომელიც სასტუმროში „თბილისი მარიოტი“ საქართველოს ფინანსთა სამინისტროს, საქართველოს ფინანსთა სამინისტროს აკადემიის, ცენტრალური აზიის რეგიონალური ეკონომიკური თანამშრომლობის ინსტიტუტის (CAREC Institute), აზიის განვითარების ბანკისა (ADB) და აზიის განვითარების ბანკის ინსტიტუტის (ADBI) თანამშრომლობით მიმდინარეობს.
„საქართველოს მთავრობისთვის მცირე და საშუალო ბიზნესის განვითარება და ფინანსებზე მათი ხელმისაწვდომობის გაუმჯობესება ერთ-ერთი უმნიშვნელოვანესი პრიორიტეტია,“ - განაცხადა ფინანსთა მინისტრის მოადგილემ, ნიკოლოზ გაგუამ. მისი თქმით, სამუშაო შეხვედრის მონაწილეთა შორის არიან საქართველოს, ავღანეთის, აზერბაიჯანის, ჩინეთის, ყაზახეთის, ყირგიზეთის, მონღოლეთის, პაკისტანის, თურქმენეთის და უზბეკეთის ფინანსთა და ეკონომიკის სამინისტროებისა და ეროვნული ბანკებების წარმომადგენლები, ასევე, საერთაშორისო ექსპერტები, საერთაშორისო ორგანიზაციების, სსიპ-ებისა და კერძო სექტორების წარმომადგენლები და ისინი ერთმანეთს გამოცდილებას გაუზიარებენ.
სამუშაო შეხვედრის მიზანია, ხელი შეუწყოს მცირე და საშუალო საწარმოების მიერ დაფინანსების წყაროების მოძიებასა და განსაზღვრას. აღნიშნული შეხვედრა წარმოადგენს აზიის განვითარების ბანკის ინსტიტუტის სტრატეგიის ერთ-ერთ ნაწილს: სიღარიბის დაძლევა, ინკლუზიური ზრდა და საშუალო შემოსავლის მქონე ქვეყნების მხარდაჭერა. სამუშაო შეხვედრის შედეგად გაიზრდება ცოდნა მცირე და საშუალო საწარმოების მიერ დაფინანსების მოძიების სხვადასხვა წყაროსა და შესაძლებლობების შესახებ.
შეხვედრას ესწრება 50 მონაწილე. ღონისძიება 27 ივნისს დასრულდება.
