მიკრო სიმძლავრის სადგურების სისტემის ამოქმედებით, საქართველოში მცხოვრებ ყველა ოჯახს აქვს შესაძლებლობა, საკუთარ საცხოვრებელ ტერიტორიაზე განახლებად ენერგიაზე მომუშავე მიკრო სიმძლავრის ელექტროსადგური დაამონტაჟოს, გამომუშავებული ელექტროენერგია კი თავად მოიხმაროს, - ამის შესახებ ენერგეტიკის მინისტრმა კახა კალაძემ ექსპოჯორჯიაში გამართულ პრეზენტაციაზე განაცხადა.
მისივე თქმით, იმ შემთხვევაში, თუ გამომუშავებული ელექტროენერგიის გახარჯვას სრულად ვერ შეძლებს, მომხმარებელი მას ნეტო აღრიცხვის ქსელში გაუშვებს.
„ნეტო აღრიცხვა ეს არის პირველ რიგში დემონსტრირება მოქალაქის და სახელმწიფოს ურთიერთსასარგებლო კომუნიკაციის, მეორე რიგში კი თანამედროვე, ევროპული ცხოვრების და შემოსავლის მოძიების სტილი, - აღნიშნა კალაძემ.
ფინანსთა მინისტრის, დიმიტრი ქუმსიშვილის შეფასებით კი ნეტო აღრიცხვის ამოქმედება ქვეყნის ენერგოეფექტურობისათვის ძალიან მნიშვნელოვანია და ამასთან ერთად, მოსახლეობისთვისაც დადებითი შემოსავლის წყარო გახდება.
"ექსპო-ჯორჯიაში" მიმდინარე პრეზენტაციას „ნეტო აღრიცხვის რეგულირება საქართველოში'' ენერგეტიკის მინისტრი, კახა კალაძე და ფინანსთა მინისტრი, დიმიტრი ქუმსიშვილი დაესწრნენ.
