ხულოს მუნიციპალიტეტის სოფელ ყინჩაურის მოსახლეობა საპროტესტო აქციას მართავს. მათი პროტესტი გამოიწვია ჰიდროელექტროსადგურისთვის გაყვანილმა გვირაბმა, რომელმაც მათი თქმით, საცხოვრებელი სახლები მნიშვნელოვნად დააზიანა.
აქციის მონაწილეებმა სოფლის ცენტრალური გზა გადაკეტეს და თემის გამგებლის, იზოლდა სურმანიძის კაბინეტის კარის აჭედვას აპირებენ და ამასთანავე, კომპენსაციასა და აჭარის მთავრობის თავმჯდომარესთან შეხვედრას ითხოვენ.
როგორც ყინჩაურის მკვიდრმა რომან აბაშიძემ განაცხადა, გამგებელს სოფლის საკეთილდღეოდ არაფერი გაუკეთებია.
„გვირაბის გამო, რვა თვის განმავლობაში აფეთქებები მიმდინარეობდა. სამი ოჯახი დაუყოვნებლივ უნდა გაესახლებინათ, თუმცა მათ აღარავინ აკითხავთ. კიდევ 50 ოჯახი ვართ დაზარალებული. დაშრა რამდენიმე წყარო, რომელსაც მოსახლეობა იყენებდა. აჭარის მთავრობის თავმჯდომარეს ორჯერ შევხვდით, თუმცა მთავრობამ ყველა შეთანხმება დაარღვია. იძულებულნი ვართ, რომ გამგებლის იზოლდა სურმანიძის კაბინეტის კარი ავჭედოთ. ამ ადამიანს სოფლის საკეთილდღეოდ არაფერი გაუკეთებია“, - განაცხადა რომან აბაშიძემ.
