ე.წ. ციანიდის საქმის არსებითი განხილვა თბილისის საქალაქო სასამართლოში დღეს განახლდება. ბრალდებულ გიორგი მამალაძის პროცესი 11:00 საათზეა ჩანიშნული.
დახურულ სხდომაზე პროკურატურის ერთი ან რამდენიმე მოწმე დაიკითხება.
პროკურატურას 120 მოწმე ჰყავს, მათ შორის არიან შორენა თეთრუაშვილი, სოსო ოხანაშვილი და სასულიერო პირები, თუმცა ჯერჯერობით უცნობია, თუ ვის წარმოადგენს სახელმწიფო ბრალდება. ამასთან დაკავშირებით ინფორმაციას არც ადვოკატები ფლობენ.
მოწმის დაკითხვას პროკურორები დაიწყებენ და ჯვარედინი დაკითხვის წესით ადვოკატები განაგრძობენ.
შეგახსენებთ, რომ მტკიცებულებების გამოკვლევა წინა სხდომაზე პროკურატურამ საქმის მთავარი მოწმის ჩვენებით დაიწყო. ირაკლი მამალაძე სასამართლოში შვიდი საათის განმავლობაში აძლევდა ჩვენებას.
პროკურორების ინფორმაციით, მან მამა გიორგი მამალაძის მიმართ წარდგენილი ბრალდება დაადასტურა და ცალსახად თქვა, რომ ის გეგმავდა პატრიარქის მდივან-რეფერენტის, შორენა თეთრუაშვილის მკვლელობას. დაცვის მხარე კი საპირისპიროს ამტკიცებს და ამბობს, რომ ირაკლი მამალაძემ დეკანოზისსთვის წარდგენილი ბრალი არ დაადასტურა და სასამართლოს არათანმიმდევრული და ურთიერთგამომრიცხავი ჩვენება მისცა.
თავად ირაკლი მამალაძეს მედიასთა კომენტარი არ გაუკეთებია. ის ისევე როგორც საიდუმლო შესასვლელის მეშვეობით აღმოჩნდა სასამართლო პროცესზე, ასევე სხდომათა დარბაზი სათადარიგო გასასვლელიდან დატოვა.
