ჩვენი უმნიშვნელოვანესი ამოცანაა, იმპორტირებული ენერგეტიკული რესურსები მოკლე პერიოდში ჩავანაცვლოთ ადგილობრივ ბაზარზე წარმოებული ელექტროენერგიით, - ამის შესახებ საქართველოს პრემიერ-მინისტრმა გიორგი კვირიკაშვილმა აჭარაში, ენერგეტიკის სექტორში უმსხვილესი საინვესტიციო-ინფრასტრუქტურული პროექტის – შუახევიჰესის მშენებლობის დასრულებისადმი მიძღვნილ ცერემონიაზე სიტყვით გამოსვლისას განაცხადა.
მისი თქმით, ენერგეტიკულ სფეროში განხორციელებული თითოეული პროექტი, თითოეული ახალი მეგავატი, კიდევ ერთი წინგადადგმული ნაბიჯია ჩვენი ქვეყნის ენერგეტიკული დამოუკიდებლობისთვის და ენერგეტიკული უსაფრთხოების გაძლიერების მიმართულებით.
„მინდა ხაზი გავუსვა იმ მნიშვნელოვან წვლილს, რომელიც ამ პროექტის წარმატებით განხორციელებაში შეიტანეს საერთაშორისო საფინანსო ინსტიტუტებმა, საერთაშორისო საფინანსო კორპორაციამ, ევროპის რეკონსტრუქციისა და განვითარების ბანკმა და აზიის განვითარების ბანკმა", - აღნიშნა პრემიერმა.
ცნობისთვის, შუახევიჰესის პროექტის საინვესტიციო ღირებულება 416 მილიონ ამერიკულ დოლარს შეადგენს. ჰესების დადგმული სიმძლავრე ჯამურად 187 მეგავატია. ელექტროსადგური 450 გიგავატ/საათ ელექტროენერგიას გამოიმუშავებს და უზრუნველყოფს სათბური გაზების შემცირებას წელიწადში 200 000 ტონაზე მეტით.
შუახევიჰესი პირველი ჰიდროელექტროსადგურია საქართველოში, რომელიც სერტიფიცირებულია „კლიმატის ცვლილებების შესახებ“ გაეროს ჩარჩო-კონვენციის მიერ ნახშირბადის გამოყოფის შესამცირებლად.
